Дагъустандин хуьруьн майишатдин ва недай суьрсетдин министерствода тIебиатдин бедбахтвиликди республикадин агропромышленный комплексда арадал атанвай кьетӀен гьаларин чIуру нетижаяр арадай акъудунин рекьяй оперштабдин заседание кьиле фена.
Совещанидин иштиракчийри ЧС-ди хасаратвал гайи аграрийриз тади гьалда ва нетижалудаказ куьмек гунин месэлайрал фикир желбна. Штабдин кӀвалахда «Россельхозцентр» ФГБУ-дин Дагъустанда авай филиалдин кьил Жанна Къазанбиевади, Россельхозцентрадин директордин заместитель Дмитрий Говорова, РД-дин хуьруьн майишатдин ва недай суьрсетдин министрдин сад лагьай заместитель Шарип Шарипова, министерстводин къуллугъчийри ва АПК-дин районрин управленийрин кьилери иштиракна.
Дмитрий Говорова эвездин такьатар къачун патал документар савадлудаказ ва вахтунда туькӀуьрунин важиблувал къейдна. Адан гафаралди, хасаратвилер хьанвай никIериз, терг хьанвай малариз ва чукIурнавай къурулушриз талукь делилар сад авун лазим я. Федеральный центр хуьруьн майишатдин суьрсет гьасилзавай гьар са агьалидал вичиз талукь тир такьатар тамамвилелди агакьарун патал делилрин (методикадин) рекьяй вири куьмекар гуз гьазур я.
Идалай вилик Шарип Шарипова республикадин агропромышленный комплексдиз селлери гайи зиянрин сифтегьан нетижайрикай лагьанай.
ИкI, адан гафаралди, тIебиатдин бедбахтвили хейлин телефвилерал гъана: 700-далай виниз къарамалар, 3 агъзурдав агакьна лапагар, 60 агъзурдалай гзаф къушар ва чIижерин тахминан 150 куьнуь терг хьана. Гьа са вахтунда, Шарипова къейд авурвал, малдарвилин бязи объектрал хьанвай зарар гьисабдиз къачун патал гьелелиг гьич фидай мумкинвал авач.
Набататчивилин хилен патахъай лагьайтӀа, хуьруьн майишатдин гьар жуьредин магьсулар цанвай тахминан 6 агъзур гектар чилер, гьа жергедай яз 3,5 агъзурдалай виниз зулун магьсулар цанвай никIер, 250 гектардив агакьна багълар ва тахминан 1,7 агъзур гектар уьзуьмлухарни цик акатнава.
Гьа са вахтунда министрдин заместителди къейд авурвал, яд алахьайдалай кьулухъ са жерге культураяр, гьа гьисабдай яз салан майваяр ва картуфарни, цIийи кьилелай цун хъувун мумкин я. «Чили кӀвалахун лазим я», – гьисабзава ада.
Шарипова яргъалди къвайи марфарин хъсан терефрални фикир желбна. Адан гафаралди, бул марфари яйлахар ва векь ядай чкаяр, иллаки баябан хьунин гьерекатар кьиле физвай кеферпатан зона (Къизлярдин уьруьшрин зона) бегьеман ламувилелди таъминарнава. Ида къацу хъач булдаказ акьалтуниз ва виликдай регион патал чӀехи месэла тир цицIерихъ галаз женг чӀугуниз куьмек гузва.
Саида Мурадова
