РФ-дин журналистрин союздин РД-да авай отделениди дагъустанви машгьур журналист Алик Абдулгьамидован экуь къамат эбеди авунин ниятдалди «За правду в профессии» лишандик кваз уьлкведин дережада аваз конкурс кьиле тухузва.
Машгьур меценат, «Единая Россия» партиядин член Мамед Абасован куьмекдалди тешкилнавай и конкурсда Россиядин жуьреба-жуьре регионрин журналистривайни блогерривай иштиракиз жеда.
Конкурс 15-майдалди 4 номинациядай (печатдин СМИ-яр, электронный СМИ-яр, телевидение ва радио, блогосфера) кIвалахар кьабулзава. Кьилин шартI — конкурсдиз ракъурзавай кIвалахра (макъалада, видеосюжетда) тIал алай, вири дагъустанвийрик ва я кьилди са муниципалитетдин агьалийрик къалабулух кутазвай месэлаяр къарагъарна кIанзава.
Конкурсда гъалиб хьайибур патал гьар са номинациядай дипломарни пулдин пишкешар тайинарнава: 1-чка – 50 агъзур, 2-чка – 30 агъзур ва 3-чка – 20 агъзур манат. Шабагьар 22-майдиз Махачкъалада Алик Абдулгьамидов рикIел хкуниз талукьарна тешкилдай мярекатдал вахкуда.
Конкурсдин шартIарикай гегьеншдиз РФ-дин журналистрин союздин РД-да авай отделенидин сайтдай ва я телеграм-каналдай кIелиз жеда.
Чи мухбир
