18-октябрдиз Каспийскда, «Скорпион-Каспий» ОМОН-дин базада, Росгвардиядин Дагъустанда авай Управленидин махсус отряд (ОМОН) арадал атана 25 йис тамам хьуниз талукьарнавай шадвилин мярекатар кьиле фена. Омоновчийриз юбилей тебрик ийиз региондин Управленидин начальник, генерал-майор Александр Орехов, Дагъустандин Кьилин куьмекчи Саид Маматханов, къуллугъдин ветеранар, Росгвардиядин профилдин классда кIелзавай аялар, телеф хьайи омоновчийрин уьмуьрдин юлдашар, аялар ва маса мугьманар атанвай.
Юбилейдин мярекатар башламишдалди вилик кIватI хьанвайбуру, гьа гьисабдай яз «Скорпион-Каспий» ОМОН-дин командирдин везифаяр вахтуналди тамамарзавай Абакаргьажи Абакарова, ана зегьмет чIугвазвайбуру, къуллугъдин везифаяр кьилиз акъуддайла, телеф хьайи омоновчийриз гьаятда хкажнавай мемориалдал цуьквер эцигна, са декьикьада кисна акъвазуналди, абурун экуь къаматар рикIел хкана.
Мярекат ачухай генерал-майор Александр Орехова лишанлу югъ тебрик авунихъ галаз санал, алатнавай йисара ОМОН-да къуллугъзавай ксари, халис пешекарвал ва Ватандин вилик вафалувал къалуруналди, чпин хиве авай везифаяр намуслудаказ кьилиз акъудзавайди къейдна.
— Къалурай кьегьалвилерай 100-лай виниз къуллугъчийриз гьукуматдин шабагьар, гьа гьисабдай яз милициядин отставкада авай полковник Загьид Загьидоваз Россиядин Игитвилин тIвар гана. Кьилиз акъудзавай къуллугъдай ва гьакIни женгинин дуствилин баркаллу адетар хуьнай куьн сагърай. Ветеранрин тIварунихъни заз чими келимаяр лугьуз кIанзава. Абуру чпин къуллугъдин ва уьмуьрдин тежриба жегьилрив агакьарзава, чаз абур бедендизни руьгьдиз мягькембур яз тербияламишунин крара куьмекзава, — лагьана ада.
Санлай уьлкве, республика патал четинди хьайи 1999-йисуз махсус батальондин чкадал арадал гъайи ОМОН-дин тарихдикай А. Абакарова суьгьбетна. КIвалахдин везифаяр кьилиз акъуддайла, телеф хьайи юлдашар, абурун хизанар садрани рикIелай алуд тийидайди раижна.
Дагъустандин Кьил Сергей Меликован тIварунихъай Саид Маматханова омоновчийриз, гьакI ветеранриз лишанлу югъ тебрикна. Отрядди республикадин ва санлай уьлкведин хатасузвал таъминарунин къаравулда акъвазун давамарзавайди, эхиримжи йисара СВО-да чпин хиве авай везифаяр намуслудаказ кьилиз акъудзавайди къейдна.
Юбиляррин тIварунихъ чими келимаяр амай мугьманрини лагьана. Чпин нубатдай яз, абуруни мугьманар патал яракьрин ва техникадин выставка, чуьлдин саягъда цIал тIуьнар гьазурнавай. Дагъустандин эстрададин гъетерин ва меркездин искусствойрин школадин аялрин иштираквал аваз гайи концертди виридан гуьгьуьлар ачухарна.
Шад мярекатдин сергьятра аваз, чпин везифаяр намуслудаказ кьилиз акъудзавай къуллугъчияр государстводин ва ведомстводин шабагьар, чухсагъулдин чарар ва къиметлу пишкешар гуналди къейдна.Абурун арада чи ватанэгьлиярни авай.
Мярекатдилай кьулухъ чаз вичин ери-бине Мегьарамдхуьруьн райондин Къуйсундилай тир, ОМОН-да инженервилинни техникадин отделда (взрывотехник) зегьмет чIугвазвай полициядин чIехи прапорщик Влимет Агъарзаевахъ галаз суьгьбетдай мумкинвал хьана. Ада ОМОН-да кIвалахиз 21 йис я. Алатнавай йисара чи ватанэгьлиди терроризмдиз акси яз республикада кьиле тухвай саки вири серенжемра иштиракна. Ам СВО-дин иштиракчи я. В. Агъарзаева армиядин жергейра Югославияда къуллугъна. Десантдин зурба гимида намуслудаказ вичин хиве авай буржи кьилиз акъудай ам «За дальный поход» значокдиз лайихлу хьанай. Юбилейдин мярекатдал адав «Общественный къайдаяр хуьнин карда тафаватлу хьунай» медаль вахкана.
Чна чи ватанэгьлидиз гьукуматдин шабагь, адаз ва вири омоновчийриз лишанлу югъ рикIин сидкьидай тебрикзава. Къуй дуьнья ислягь хьурай!
Рагнеда Рамалданова
