НекIедин суьрсетар арадал гъизвайбуруз государстводин патай куьмекдин такьатар къачудай мумкинвал ава. РД-дин хуьруьн майишатдин ва недай суьрсетдин министерстводи фермерриз некIедихъ галаз алакъалу метягьрин комплексар (фермаяр) эцигуниз ва я цIийи хъувуниз серфай такьатрин пай эвез хъувун патал гудай субсидийрин гьакъиндай малумарнава.
Государстводин патай куьмек къачун патал фермерривай МФЦ-дин идарада арза вугуз жеда. Арзаяр 1-сентябрдилай кьабулиз башламишнава ва 30-сентябрдалди абур кьабулун давам жеда.
Куьмекдин такьатар гунин къайдайрикай, конкурсдин комиссиядин шартIарикай галай-галайвал малуматар республикадин хуьруьн майишатдин ва недай суьрсетдин министерстводин сайтдин «Малдарвал» разделда чапнава.
Вад йисан загранпаспорт
Къецепатан уьлквейриз сиягьатдиз ва я багърийрал, чирхчиррал кьил чIугваз фин патал ватандашдихъ загранпаспорт хьун чарасуз я. Алай вахтунда и документдин кьве жуьре ава: цIийи жуьредин (биометрический) ва куьгьне жуьредин загранпаспорт.
ТIвар кьунвай паспортдин кьве жуьредихъни юридический рекьяй сад хьтин къуват ава, амма абур маса тафаватлувилелди чара жезва. Куьгьне жуьредин паспорт 5 йисан муддатда къуватда жеда. И жуьредин паспортда, 10 йисан муддатда ишлемишиз жедай паспортдилай тафаватлу яз, биометрический делилар жезвач. Идалайни гъейри, аялрин гьакъиндай малуматар анжах куьгьне жуьредин паспортда къалуриз жезва.
Куьгьне жуьредин загранпаспорт къачун патал ватандашди 2 агъзур манат госпошлина гана кIанзава. 14 йисал кьван яшара авай аялриз и документ туькIуьрдайла, – 1 агъзур манат.
Махачкъалада кардик квай МФЦ-дин кьилин идарадин пешекарри хабар гайивал, вад йисан муддатда ишлемишиз жедай загранпаспорт агъадихъ къалурнавай «Зи Документар» (МФЦ) центрайрай къачуз жеда: Махачкъалада (шегьердин вири центрайра арзаяр кьабулзава), Дербентда, Хасавюртда, Къизлярда, Левашида, Мегьарамдхуьре.
К.Ферзалиев
