Чи ватанэгьлияр – гьар сана
Краснодарда Илимдинни ахтармишунрин институтдин краевой клинический больницадин дамаррин хирург Аслан Закеряева Россияда сифте яз Da Vinci Xi роботдин куьмекдалди дуркIунрин ивидин компресс (синдром Щелкунчика) сагъар хъувун патал операция авурдакай мукьвара Россиядин Федерациядин массовый информациядин ва электронный такьатра гегьеншдаказ хабар гана. «Россия-1» телеканалди лагьайтIа, Россиядин хирургиядин сифте агалкьунрикай махсус репортаж гана. Ахьтин операция авуник вири дуьньяда духтурри кьил кутазвачир. Гьавиляй гила ачухай атIай чка (кьацI) аваз четин операция авунин мумкин тир кьве къайдадикай сад жеда.
Вуж я ам, лап кьетIен операция авур, Россияда лап хъсан дамаррин хирург яз гьисабзавай Аслан Закеряев?
Чавай дамахдивди лугьуз жеда хьи, Аслан Бубаевич кьегьал лезги хва я. Гьавиляй заз чи газет кIелзавайбуруз адакай авай куьруь малуматар гуз кIанзава.
Аслан Закеряев 1988-йисан 14-августдиз СтIал Сулейманан райондин Вини СтIалрин хуьре дидедиз хьана. Ада 1994-йисалай 2002-йисалди Каспийск шегьердин 1-нумрадин СОШ-да, 2002-йисалай 2004-йисалди Вини СтIалрин СОШ-да, 2004-йисалай 2005-йисалди Кьасумхуьруьн 1-нумрадин СОШ-да лап хъсан къиметар аваз кIелна.
Аслан 2005-йисуз Дагъустандин медицинадин Академиядин лечебный факультетдик экечIна, 2011-йисуз анаг акьалтIарна.
2011-йисалай 2013-йисалди ада Кубандин медицинадин университетда ФПК ППС-да рикIинни дамаррин хирургиядин рекьяй клинический ординатурада чирвилер артухарна. Гьеле ординатор тир вахтунда лезги хци вичин зурба алакьунар къалурна. Иниз килигна 2014-йисуз Аслан Бубаевичаз Краснодардин профессор С.В.Очановскийдин тIварцIихъ галай институтдин 1-нумрадин Краевой клинический больницадиз кIвалахал теклифна. Гьа йикъалай инихъ хирург, кьилин категориядин духтур А.Закеряева 1-нумрадин ККБ-дин дамаррин хирургиядин отделенида кIвалахзава.
2022-йисалай Аслан Бубаевич КубГМУ-дин 1-нумрадин хирургиядин кафедрадин соискатель, 2023-йисалай КубГМУ-дин 1-нумрадин хирургиядин кафедрадин ассистент я.
Краснодарда хирург яз кIвалахзавай 10 йисан къене ам Россияда рикIинни дамаррин лап хъсан хирургрин жергедиз экъечIна.
Аслан Закеряевахъ илимдин 30-далай виниз кIвалахар ва патентар ава. Аслан Бубаевича 1-нумрадин НИИ-ККБ-да авур хьтин са жерге операцияр (торако-бедреное шунтирование при тотальных кальцинозах вен, резекция аневризмы печеночной артерии и других висцеральных артерий) виликдай вири дуьньяда авунвачир.
Эхь, Лезгистан, Дагъустан вири дуьньяда машгьур авур зурба пешекарар чи халкьдин арадай вири девирра акъатайди я. И кар алай вахтунда Аслан Бубаевич Закеряева давамарунал чна гьахълудаказ дамахзава.
Медицинада четин хилерикай сад тир хирургияда къазанмишнавай зурба агалкьунар мубарак авуналди, чаз Аслан Бубаевичахъ мягькем сагъламвал, хизанда хушбахтлувал, кIвалахда мадни еке агалкьунар хьана кIанзава.
Хазран Кьасумов
