Эхиримжи йисара, республикадин са жерге муниципалитетра хьиз, СтIал Сулейманан райондани рекьер цIийикIа туькIуьр хъувунин кIвалахар кьиле физва. И крар государстводин программайрин, проектрин сергьятра аваз тешкилзава. Мисал яз, «Хатасуз ва ерилу рекьер» программадин куьмекдалди Дагъустанда гзаф кьадар мензилра рекьер ремонт хъувунва.
Виликдай рекьера къир цун анихъ амукьуй, вацIун кьеряй гъизвай хирхемни кваз бес кьадар жедачир. Шукур Аллагьдиз, чи йикъара гзаф хуьрера вижевай рекьер ава. СтIал Сулейманан районда и жигьетдай кьиле тухузвай кIвалахар давам жезва.
Мисал яз, Мурцукьил Дулама участокда гужлу техникади, гзаф кьадар рабочийри кIвалахзава. И йикъара зун чкадал фена ва рекьерин тежрибалу устIар, вичин коллективдихъ галаз санал, кьве гъилни къакъажна, кIвалахзавай Мегьамед Гьуьсейновахъ галаз таниш хьана, адаз са шумуд суал гана.
Малум хьайивал, ина рехъ цIийикIа туькIуьр хъувунин кIвалахар Ботлих райондин рекьерин управленидин векилри тамамарзава. Рабочияр саки вири жегьилар, гъавурда авай пешекарар я. Гьавиляй гъиле кьунвай карни хъсан ери аваз кьилиз акъудзава.
— Са куьруь вахтунда ингье и сергьят, гужлу техникадалди къадгъунна, дуьзарна, тунар-синер алудна, къир цадай гьалдиз гъанва, — къалурзава заз М.Гьуьсейнова. – Гьелелиг чна 2 километрни 750 метрдин мензилда къир цана акьалтIарнава. Пуд КамАЗ-да аваз вахт-вахтунда чкадал къир агакьарзава.
– И гадайрин кеспи вуч я? – хабар кьуна, гъилера перер, махсус цуьруьгъуьлар авай гадаяр къалурна.
— Абурукай сад Аслан я, ада чилел вегьенвай къир сад хьиз чукIурзава, Марсела варданаг хьтин элкъвей махсус алатдалди чил дуьзарзава, Гьабибани Гьажиди абуруз куьмекар гузва. Гадайри, сада-садаз куьмекар гуз, зи-ви талгьуз, зегьмет чIугвазва. Зул алукьнава, йикъар къвердавай куьруь жезва, чаз вахтунда къир цана акьалтIариз кIанзава.
– Куьне рехъ гьиниз кьван цIийикIа туькIуьр хъийизва?
— И рекьихъ еке метлеб ава. Ам Сиртичрин хуьр алай чкадилай федеральный дережадин шегьре рекьихъ галкIизва. Чна, санлай къачурла, 12 километрдин мензил ремонтда. Гьаваяр хъсанзамай кьван Дулама участокда кIвалахар акьалтIардай фикир ава. Им гзаф къекъуьнар, тунар, лекъвер авай чка я. Гьавиляй кIвалахни чаз кIандайвал вилик физвач. ЯтIани чна, вири къуватар желб авуна, кIвалахзава.
Дулама участок КIварчагъ дередин са пай я. Ина къир цанвай рехъ хьун шад жедай кар я. И кIвалах кьилиз акъудзавай устIарриз къуй Аллагьди къуватар гурай!
Райсудин Набиев
