Эхиримжи йисара Сулейман-Стальский районда экономика мягькем жезва, хуьруьн майишат вилик физва, гьасилзавай суьрсетдин кьадар артухарзава.
— Вири и кIвалахриз районда инвестиционный проектар кардик кутуни екедаказ куьмек гузва, — лугьузва райондин хуьруьн майишатдин ва суьрсетдин управленидин начальник Мегьамедзагьид Бабаева. – Теплицайрин майишатра салан майваяр, ачух майданра бахчадин няметар цун – имни районда хьанвай цIийивал я. Вири и серенжемри халкьдин суфра берекатлу ийизва, агьалийрин яшайиш хъсанарзава.
Мегьамедзагьид Бабаеван гафарин гьахълувал тестикьарун патал къейд ийиз кIанзава хьи, алатай йисуз районда 28376 тонн салан ва 2450 тонн бустандин майваяр кIватI хъувуна.
Малум тирвал, эхиримжи вахтара районда салан майваяр теплицайрин майишатра битмишарзава. Им менфятлу къайдани я, гьикI лагьайтIа теплицайрин майишатри агьалияр йисан кьиляй-кьилиз помидорралди, афнийралди ва салан маса няметралди таъминарзава.
Гьа са вахтунда агьалийри (иллаки Эминхуьре, Чуьхверхуьрел, ДаркIуш-Къазмайрал, ЦIийи Макьарал ва Герейханован хуьре) салан майваяр ачух майданра гьасилунни давамзава. И рекьяй абурухъ гзаф йисарин хъсан тежрибани ава.
Чаз малум хьайивал, алай йисан бегьер патал районда 935 гектарда бустандин майваяр цанва. Районда салан ва бустандин майваяр кIватI хъувунин кIвалахар хъсан еришар ва тешкиллувал аваз кьиле физва. Икьван чIавалди райондин хуьруьн майишатдин карханайри, лежбервилинни фермервилин майишатри, ЛПХ-ри ва арендаторри 21500 тонн салан майваяр ва бустандин няметар кIватI хъувунва.
Халияр, хъарпузар асул гьисабдай, Зардияндин зонада 135 гектар цанва. Халияр гьасилунал ЛПХ-яр, карчияр ва арендаторар машгъул жезва.
Арендаторри чаз лагьайвал, халияр гьасилдайла абуру чкадин миянардай шейэр (кьук) ишлемишзава. Гьавиляй абур экологиядин жигьетдай михьибур, дадуниз ширинбур, инсандин бедендиз гзаф менфят авайбур жезва. Гектардин бегьерлувал 50 центнердив агакьзава.
Халияр, хъарпузар гьам чкадал маса гузва, гьакIни Дагъустан Республикадин ва Урусатдин шегьерриз рекье твазва. Муьштерийрин патайни ихьтин продукциядихъ еке игьтияж ава.
Районда салан майваяр ва бустандин няметар кIватI хъувун давам жезва.
Хазран Кьасумов
