Ватандин ЧIехи дяведа миллионралди инсанри иштиракна. Мукьвара Россиядин ва гзаф маса уьлквейрин халкьарини Дуьньядин кьвед лагьай дяве акьалтIунин югъ рикIел хкана ва къейдна.
Фашистрикай Ватан хуьн патал фронтдиз агъзурралди чи ватанэгьлиярни фена. Хуьрера амукьай дидейри, сусари, вахари душмандихъ галаз къизгъин женгер кьиле тухузвай кьегьалрикай вишералди маниярни туькIуьрна.
Вичин аялвал дяведин йисарал ацалтай, ахпа Къиргъистандиз акъатай ва 1960-йисарилай Дагъустандин Огни шегьерда яшамиш жезвай хпежви (Кьурагь район), чи газетдин амадаг Ибрагьимов Вердиди вичиз хуьруьн дишегьлийривай ван хьайи манияр рикIел хвена ва, абур кхьена, газетдиз рекье туна.
Халкьдин хурун эсерар — милли эдебиятдин къимет авачир хазина я. Ам кIватI хъувун, хуьн, гележегдин несилрал агакьарун чи везифа я. Инанмиш я, чи хуьрера халкьдин манияр рикIе хуьзвай дишегьлияр тIимил авач. Абурун хурун дафтарар майдандиз ахкъудиз хьанайтIа, гьикьван хъсан тир.
Белки, Ибрагьимов Вердидилай чи кIелзавайбуруни чешне къачун.
Я зун хайи азиз диде,
Зун фронтдиз хайид яни?
Я заз гъайи гуьзел суна.
Вун кьуд цлаз гъайид яни?
Зун фронтдиз тухвай бере,
Югъди-йифди гьатна рикIе.
Зун фронтдай тахтун хьайтIа,
Сусакай ваз руш хьуй диде.
Дидед авур фар-ятар гваз,
Станцидик вун илифда.
Хтарик квай мержан хьтин
Заз ви жегьил чан гьайифда.
Украиндиз агакьайла,
МетIерихъ кьван цыр я, диде.
Къайи чилел къаткидай кьван,
Зи ширин чан мур я диде.
Чи Ватандин гуьзел чилел,
Гуьлле къвада тилер-тилер.
Са балади чан гана лагь,
Дидед гатаз метIер-кьилер.
Вун фронтдин кьулавайла,
Я тарцелай рахай билбил.
ЭрчIи патай гуьлле фейла,
Ни эцигда ви пелел гъил?
ИкI недай фу зегьримар хьуй,
Зун цIивиндин фурава лагь!
Салам — дуьа твах зи ярдиз.
Чан атана хурава лагь!
На пенжердин хел акьалмир,
Ви пенжердихъ зи гъил гала.
На рахкурай затIни кIандач,
Вун акунихъ зи вил гала.
Марфадик квай лацу стIал,
Къагьведанда зумзумдин яд.
Яр авачир харапIада
Ширбетдикай къвезвач хьи дад.
Гъилихъ галай къизилдин сят,
Виш манатдин занжур галай.
Армидиз фей кIани гада,
Вун акунихъ зи вил гала.
Пенжеридиз жуна яда,
Чубарукар татуй лугьуз.
За Аллагьдиз минетзава,
РикIин мурад хтуй лугьуз.
Я манияр ядай машин
Вун и кIвалин кьулал кIандай.
“Къазаматдиз” акъатай яр
Хкведай вахт мукьвал кIандай.
Вил вегьена килигайла,
Айвандик квай яру тайгъун.
Де вун сагърай, зун саламат,
Тевекул я чун чаз ахкун.
РикI алай яр, рикIинал ша,
ПIапIрусдин гум кIвале твамир.
Жезамай кьван гьереката,
Зун такIандан гъиле твамир.
Уьтмиш хьана фена зи яр,
Де вун сагърай лацу куьрпе
Ахквадай туш гила чун чаз,
ЦIай кьуна куй къариб уьлкве.
На аскерриз тербия гуз,
Я вун алай яру балкIан.
Ватан гъалиб авур игит,
Шинелдикай хьана кафан.
Дидединни бубад умуд,
Хва фронтда ава лугьуз.
Гъейрибурун гъилералди
Вун авудна мичIи суруз.
Хпежарин хуьр бине я,
Верди авай ахъа пенжер.
Гъуцаривай тIалабзава
Гьич садазни тагуй дердер.
Лезги Газет
