1982-йис тир. За меркездин сад лагьай нумрадин аялар хадай кIвале (роддомда) кьилин духтурвиле кIвалахзавай. Кьвед лагьай йиса кIвач эцигнавай. Зун къведалди ина са шумуд йисуз са чIехи начальникдин папа агъавалнай. Роддомда дишегьлийринни бицIекрин сагъвал хуьдай кардал ам бажагьат алахънай.
Эвелни-эвел кIвалахзавай пешекаррин зегьметдин низам дуьз геле хтуна, абур вердиш хьанвай тегьердивай къакъудна кIанзавай.
Азарлу инсандиз духтурдин куьмек, юкъуз хьиз, йифизни герек жедайди садазни сир туш. Гьавиляй больницайра йифен вахтундани дежурный духтурри кIвалахзавайди я. Амма йифиз абур пара вахтара гуьзчивилик кутазвачир. Жергедин духтурри и кIвалах чпин мажбурнама язни гьисабзавачир.
А кар администрациядин хиве тунвай, йифен вахтундани, садазни малумар тавуна, обходар авун герек тир.
Жуван хиве авай буржи тамамариз, зунни йифен обходар ийиз эгечIна. Акурди рикI тIардай шикил хьана. КIвалахдин чкайрал дежурныяр жагъун тавур дуьшуьшрин кьадарди зун къарсурнай. КIвалах масакIа тешкилна кIанзавай. Низам мягькемардай серенжемрив эгечIна…
А вахтара цлан газет лугьудай са затI авайди тир. Чи коллективдини мукьвал-мукьвал адан чинра чпин мажбурнамайрикай, маса крарикайни кхьизвай. ЦIийи йисан суварин вилик чи юлдашри газетдин са ажайиб нумра акъудна. Ана, кIвачел куркур алай мясерар алаз, устадвилелди чIугунвай зи шикилни авай. Манадин гъавурда зун гьасятда акьуна. Къайда-низам чIурзавайбуруз кьилин духтурдиз Аяз-Бубади цIийи йисан пишкеш яз куркур алай масерар гана кIанзавай. Йифиз, хабарсуз обходдиз къведайла, куркурди зенг яна, чпиз виликамаз чир хьун патал…
А йисара тIвар-ван авай шаирар, алимар, артистар, суварар тебрикиз, коллективриз илифдай адетни авайди тир.
Чи роддомдиз шаир Фазу Алиева илифна. Къейд ийин, гуьруьш рикIел аламукьдай маракьлуди хьанай. Чи духтурри адаз чпи акъуднавай цлан газетдин цIийи нумрани къалурнай.
Мугьман, шикилдин вилик акъвазна, са шумуд декьикьада адаз дикъетдалди килигна. Ахпа авторривай хабар кьуна:
— Квез кьилин духтурди куркур алай кIвачин къапар вучиз алукIна кIанзава?
Жавабди ам гьейранарна.
— ЧIехида, йифиз атана, ахтармишдайла, куркурди виликамаз хабар гудайвал…
Камалэгьли шаирдиз больницада йифен вахтунда дежурствойра ксузвайбур, чпин постарал тежезвайбур авайди малум хьана. Ада, зун арада тун тавуна, а шикил майдандиз акъудайбуруз рикIелай тефидай тарс ганай. Халкьдин махуна кациз кар кьаз кIан хьайи кьиферин межлисдикай суьгьбетна. Кацин туьтуьна куркур галай чIул твадайди кьиферикай садни жагъун тавурдини лагьана. Аяз-Бубади куркур алай мясерар багъиш авуртIани, абур чIехидан кIвачел алукIдай викIегь кас и духтуррин арадай бажагьат жагъида. Инал ада, чина жавабдарвилин лишан туна, вичин насигьат гана: “Ихьтин уюнар-къундармаяр ийидалди, гьар сада вичин мажбурнамаяр намуслудаказ тамамарайтIа, хъсан аквазва заз. Куь кьилни вине жеда, азарлуйривни лазим куьмек вахтунда агакьда. Абур квелай рази язни амукьда. Чилел инсанвилелди яшамиш хьун виридалайни четин къуллугъ я. Гьиллейралди кIвалахуни садални абур гъайиди туш. Хъсан балкIанди къамчи, хъсан духтурди туьнбуьгь къазанмишдач. Духтур азарлудан винел, шараграл кард хьиз, элкъуьн лазим я… Заз куьне а куркур лугьудайди намусдалди эвезнайтIа кIандай”, — хълагьна, гьамиша хьиз, вичин чина милайим хъвер туна, ам кис хьана.
“Гила чна пластинка дегишарда”, — лагьана, и “тарсунилай” гуьгъуьниз ада чи духтурриз хуралай гзаф къешенгдиз вичин шиирар кIелнай. И карда ам тешпигь авачир хьтин устад тир. Гурлу капаралди духтурри адаз чпин гьуьрмет ва кIанивал багъишнай…
Фазу Алиева хъфидайла кIвачел куркур алай кьилин духтурдин шикил цлал аламачир. Шаирди гайи “тарсунал” амал ийидайди ва адакай хийир хкуддайди вирида къалурнай.
Азедин Эсетов,
РД-дин халкьдин духтур
