Чи ватанэгьлияр — гьар сана

Чидайбуру адакай анжах хъсан гафар лугьуда. Агъайнавални къенивал хас тирвиляй адалай регьбервилин къуллугърал вичин гъилик кIвалахзавай амадагрин па­тай гьуьрметни нуфуз къазанмишиз алакьзава. Зи ихтилат Россиядин бизнесдин чIехи векил, Краснодардин крайдин Усть-Лабинск шегьерда кардик квай ­«Агро Экспорт» ООО-дин генеральный директор Азим Мегьамедалиевич ­Къазиевакай я.

Чун адахъ галаз алатай йисуз «Лезги газетдин» редакцияда таниш хьанай. Краснодардин крайда авай лезгийрикай, милли меденият хуьнин рекье ватанэгьлийри кьиле тухузвай мярекатрикай ада чаз итижлу ихтилатар авуна. «Краснодардин крайда 10 агъзурдав агакьна лезгияр яшамиш жезва. Санал кIватI жез, лезгийрин общинади гьар жуьре суварар кьиле тухузва: Яран сувар, ЦIийи йис, Ватан хуьзвайбурун югъ, «Шарвили» ва масабур. Спортдин акъажунар лагьайтIа, гьамиша тешкилзава»,  — лагьана ада.

Азим Къазиев 1970-йисуз Мегьарамдхуьруьн райондин Къуюстанрин хуьре дидедиз хьана. 1992-1999-йисара Мегьарамдхуьруьн райондин ОВД-да милиционер яз, 1999-2011-йисара и райондин суддин приставрин къуллугъдин отделдин, 2011-2020-йисара районда пенсийрин фондунин управленидин начальниквиле кIва­лахна. 2020-йисалай инихъ Краснодарда «Агро Экспорт» тешкилатдин генеральный директор я.

Алай йисан 23-февралдиз Мегьарамдхуьруьн райондин Ярагъ-Къазмай­рал кьиле фейи лезги чIалан гегьенш форумдал, гуьгъуьнлай Дербентда ФЛНКА-ди кьиле тухвай «Лезги гъед» премиядиз талукь мярекатдал Азим Къазиева авур ихтилатри ам ялавлу ватанперес, халкьдиз талукь умуми крарик къуьн кутаз ­гьазур кас тирди мад сеферда тес­ти­кьарна.

Хайи чIал хуьниз талукь форумдин иштиракчийрихъ элкъвена, ада лагьана: «Урусатда лезгияр гьалтай бязи дуьшуьш­ра чун кIеве гьатзава. Гила, къанунар дегиш хьана, паспортда миллетни къалурзавач. Гьинай я лагьана хабар кьурла, урусдалди «зун гъавурда акьазвач» лугьуз жаваб гуда. Ина гзаф дишегьлияр кIватI хьанва. Чахъ «дана — епинамаз, аял кьепIинамаз вердишарна кIанда» лугьудай мисал ава.  Дишегьлийри кьепIина авай аялдиз «мамино золото» лугьудалди, «дидедин къизил» лагьайтIа, заз чиз, абурлу жеда. Асул гьисабдай ихьтин крар дидейрилай аслу я».

Азим Къазиева авунвай бязи крари­кай заз адан дуст, жемиятдин деятель ­Садикь Гьасановани са куьруь ихти­лат­ авуна: «Азим Къазиевахъ галаз зун 2021-йисуз Краснодарда «Лезги сувар»­ лишандик кваз кьиле фейи милли медениятдин мярекатда таниш хьана. А чIа­валай инихъ чун дустар я. Хъсан къилихрин, дуствал кIани, вичин хайи хуьр патал алакьдай куьмекар ийизвай, халкьдихъ рикI кузвай ватанэгьли я. Заз ван хьайи малуматралди, ада хайи хуьре ­экверин, рекьерин месэлаяр гьялуник пай кутуна. ЧIехи тешкилатдин регьбервилин къуллугъдал алаз, исятдани ада Краснодардин крайда кьиле физвай лезгийрин вири милли мярекатрик къуьн кутазва».

Заз чидайвал, ФЛНКА-ди тешкилнавай «Лезги гъед» премиядин кьве лауреатдиз пулунин пишкешар (200 агъзур манат) цIи Азим Мегьамедалиевича чара авуна.

Вишералди инсанри кIвалахзавай карчивилин еке тешкилатдин регьберди халкьдин месэлайриз фикир гудай вахт жагъурун тек-туьк гьалтдай дуьшуьшрикай я. Краснодардиз куьч хьана саки 5 йис ятIани, адалай а крайда авай лезгийрихъ галаз алакъаяр хуьз, абурун садвал мадни мягькемардай рекьер жагъуриз алакьзава.

«Сифтедай зун Краснодарда лезгий­рин общинадин виликан председатель­  Ярагьмед Ярагьмедовахъ галаз таниш хьана. 25 йис идалай вилик ада Мирзе­баладихъ­ галаз санал лезгийрин община тешкилна. Абур чи арада амач, Аллагьди рагьметрай чпиз. Лайихлу ватанэгьлийри кьил кутур кар чна исятдани акъвазарнавач. Алай вахтунда председателвиле хкянавай Нажмудин Муртузоваз чна вирида куьмекар гузва. Ада Ростовдин, Ставрополдин, Астрахандин, Белгороддин лезгийрин милли общинайрихъ галаз сих алакъаяр хуьзва», — ихтилат давамарзава А.Къазиева.

Ада алава хъувурвал, халкь патал пара хъсан крар кьилиз акъудунин рекье ФЛНКА-дихъ галазни хъсан алакъаяр хуьзва. И тешкилатди, мергьяматлувилин «ЛЕКИ» фондуни кьиле тухузвай хийирлу мярекатар вичин рикIизни хуш ва фирмадин патай алакьдай куьмекар гуз гьазур тирдини лугьузва.

Малум хьайивал, Краснодарда лезги чIал чириз кIандайбуруз тарсар гудай муаллимни фадлай тайинарнава. И кIватIалдини кIвалахзава.

Чаз Азим Къазиевахъ кьилиз акъудзавай, гъиле кьазвай вири крара анжах агалкьунар хьана кIанзава.

Куругъли  Ферзалиев