Фестиваль

И йикъара Севастополда Россия­дин 16 региондай, гьа гьисабдай яз Дагъустандайни, гьар са региондай са командади иштирак авуналди, уьлкведин Кьиблепатан халкьарин культурадин ва спортдин фестиваль кьиле фена. Ам ЧIехи Гъалибвилин 80 йис тамам хьуниз талукьарнавай. Дагъус­тандин хкянавай команда фестивалда 2-чкадиз лайихлу хьана. Шадвилелди мадни а кардикай хабар гуз кIан­зава хьи, и фестивалда­ вичин­ ери-бине СтIал Сулейманан­ рай­ондин Алидхуьрелай­ тир, универ­сальный бягьсерай­ ва самбодай­ спортдин кьакьан кукIушар муь­тIуь­гъарнавай Аслан Къурбанова 98 кг-дал къве­далди заланвал авайбурун арада самбодай 2-чка кьуна.

Кеферпатан Кавказдин респуб­ликайрилай гъейри, ана Крымдай­, ДНР-дай, ЛНР-дай, Запорожьедин­ ва Херсондин областрай тир 1500- далай виниз спортсменри­ армрестлингдай, чIемерукрай ягъу­най­, канат ялунай, самбодай, ми­ни-футболдай, чукIул гадарунин­ спортдай, фиджитал-баскетболдай пуд юкъуз чпин устадвал къалурна. Фес­ти­вал­дин сергьятра аваз, милли выс­тав­каяр-мекераяр ва яратмишунардай коллективрин форумни кьиле фена.

РикIел хкин: вичин макьсад адетдин культура ва спортдин милли жуьреяр хуьн тир Россиядин Кьиблепатан халкьарин культурадин ва спортдин фестиваль РФ-дин спортдин министерстводин тапшуругъдалди Россиядин культурадин министерстводин куьмекни галаз 2010-йисалай инихъ кьиле тухузва. 2021-йисал­ди спортдин и серенжем Кеферпатан Кавказдин федеральный округдик акатзавай республикайра, гьа гьисабдай яз сифтегьан кьве йисуз, а вахтунда «Кавказдин къугъунар» лугьузвай, абур Ка­ра­чаево-Черкесияда, 2015-йисан сентябр­диз Дагъустанда кьиле тухванай. Махачкъалада, «Труд» стадиондал, фестиваль ачухуниз талукьарнавай шад мярекатда гьуьрметлу гзаф мугьманри иштиракнай. Кьилди къачуртIа, абурун арада а чIавуз РФ-дин Кеферпатан Кавказдин крарин рекьяй министр Лев Кузнецов, Россиядин спортдин министрдин заместитель Юрий Нагорных, РФ-дин Президентдин патай тамам ихтиярар ганвай векилдин замес­титель Николай Лисинский ва масабур авай. А вахтунда Дагъустандин кьил Рамазан Абдулатипов тир, республикадин жавабдар къуллугърал алай гзаф ксарни  трибунада ацукьнаваз, фестиваль хъсан тешкиллувал аваз кьиле тухванай.

Севастополда кьиле тухвай фестивални вичин макьсаддив агакьнавайди ам агалуниз талукьарнавай шад мярекатдал рахай ксари, гьа гьисабдай яз губернатор Михаил Развожаева, РФ-дин спортдин министрдин заместитель Одес Байсултанова ва масабуру кьетIендаказ къейдна.

— Чи Ватандин, чIехи Россиядин къуват садвиле, халкьарин дуствиле авайди чна мад сеферда субутна. Спортдин майданра командайри чпин къуватлувал, сегьнейрални культурадин рекьяй устадри чпин адетрин кьетIенвал къалурна. Чахъ акьван девлетлу культура, ахьтин хъсан адетар ава хьи, гьелбетда, чал гъалиб жез садалайни алакьдач, — къейдна губернаторди.

Рагнеда Рамалданова