“Агьалияр кьетIен гьалара хуьдай Интербригада” ДРОО-дин Советдин къарардалди ва адан командующий, генерал-майор Шамил Асланован приказдалди Махачкъала шегьердин 10-нумрадин школадин директор Рамиз Сердероваз акьалтзавай несил ватанпересвилин, Ватан кIан хьунин руьгьдаллаз тербияламишунин кардик еке пай кутунай “За патриотизм” медаль гана.
И мектебда награда вахкузвай мярекатда генерал Шамил Асланова, адан заместитель полковник Маркс Жанаева, и цIарарин авторди, общественный тешкилатдин пресс-къуллугъдин кьил Гьажи Мирзаева, меркездин 12, 14, 50 ва 59-нумрайрин школайрин директорар тир Насрудин Мирзегьасанова, Мегьамед Багандова, Махач Изиева, Ибрагьим Байсунгурова, 10-нумрадин школадин директордин хатасузвилин рекьяй заместитель, полициядин оставкада авай полковник Владимир Леонгарда, информациядин рекьяй заместитель Мурад Ибрагьимова, майишатдин рекьяй заместитель Къиясудин Канбегова, бухгалтер Рузмина Насрудиновади ва маса ксари иштиракна.
Сифте чун мектебдиз ва анин гьаятдиз килигна. Ам гегьенш ва михьи я. ЦIийи корпус гилиг хъувунва. Кабинетра алай аямдин тадаракар ава. Гимнастикадал машгъул жедай, футболдал къугъвадай майданар кардик ква. Ихьтин гегьенш гьаят хуьз алай аямдин шартIара квелай гьикI алакьна лагьана хабар кьурла, директорди, хъвер авуналди, куьрелди жаваб гана: “Давамна, дурум гана” (выстояли).
Рамиз Сердеровав медаль вахкудайла, генерал Ш.Асланова икI лагьана: «Рамиз Мирзегьасановича образованидин хиле зегьмет чIугваз 35 йис я, адакай 18 йисуз — директорвиле. Кьилин категориядин муаллим, тарихдин илимрин доктор тир ада 1989-йисуз юкьван мектебрин жегьил директоррин республиканский конкурсда 1-чка кьуна. Ам “РД-дин халкьдин образованидин отличник”, Россиядин Федерациядин умуми образованидин гьуьрметлу работник” тIварариз лайихлу хьанва…”
Зани алава хъувуна хьи, кIелзавайбур ватанпересвилин руьгьдаллаз тербияламишуниз артух фикир гун Рамиз Сердерован лайихлувал я. Ам кьиле авай школадин аялри “Победа”, “Ополченец” къугъунра, “Ваз Ватанди ихтибарзава” клубда, ТОКС-да, “Годен к строевой”, “Призывникдин югъ” ва маса мярекатра активвилелди иштиракзава. Образованидин хиле кар алай терефрин кьетIенвилер дериндай чир хьуни, гражданвилин активвили ва жавабдарвал аннамишуни Рамиз Мирзегьасановичаз мектебдин коллективдиз кар чиз регьбервалдай, тарихдин ва маса тарсарни пешекарвилин вини дережада аваз тухудай мумкинвал гузва.
Маркс Жанаева къейд авурвал, 1999-йисан августдин Дагъустандиз къурхулувал авай четин йикъара Р.Сердерова Махачкъаладин лап важиблу объектар хуьзвай. Къе лагьайтIа, Р.Сердеров кьиле авай коллективди школадин хъсан адетар хуьзва, давамарзава, образованидин хиле цIийи терефар уьмуьрдиз кечирмишзава. Шад жедай кар ам я хьи, 2007-йисуз 10-нумрадин школа “Образование” проект уьмуьрдиз кечирмишунин сергьятра аваз Президентдин грантдиз лайихлу хьана. И школада алай вахтунда РФ-дин умуми образованидин гьуьрметлу работникар тир 23 педагогди, РД-дин образованидин — 13, РД-дин халкьдин образованидин кьве отличникди зегьмет чIугвазва.
«И школада кIелзавайбурукай гзафбурукай шегьердин ва республикадин олимпиадайра, конкурсра, конференцийра гъалибчиярни призерар жез пара йисар я. Эхиримжи пуд йисуз 10-нумрадин мектебдин 23 ученик — шегьердин олимпиадайра, 21 кас “Гележегдиз кам” конференциядин гъалибчияр хьана, 70 ученикди медалар къачуна, 7 кас военный училищейрик экечIна. Эхиримжи йисара “СОШ №10” МБОУ акьалтIарзавайбурун 99 процент вузриз гьахьзава. Ихьтин школадиз регьбервал гузвай Рамиз Мирзегьасанович “За патриотизм” медалдиз лайихлу я”, — лагьана 59-нумрадин мектебдин директор И.Байсунгурова.
Наградадиз лайихлу хьанвай Р.Сердерова “Интербригададин» аскерди кьин кьунин текст кIелна: “Халкьдин ополченидин жергейриз гьахьуналди, Россиядин халкьар къецепатан ва къенепатан душманрикай, тахсиркаррин чIуру къастарикай ва кьетIен гьаларикай хуьда лагьана, кьин кьазва…” Ада “Интербригададин” регьбердиз чухсагъул лагьана, инлай кьулухъни кар алай къуватрин сифте жергейра жедайдахъ кIватI хьанвайбур инанмишарна. “Интербригададин” командующийдин приказдалди Р.Сердероваз халкьдин ополченидин майорвилин чин гана. Чна вирида Рамиз Мирзегьасановичаз наградани чин мубаракна, гележегда мадни еке агалкьунар хьун алхишна.
Низам Шахбанов, РФ-дин умуми образованидин гьуьрметлу работник
