Къенин несилдиз Украинадин бандерачийри Ватандин ЧIехи дяведин ва адалай гуьгъуьнин йисарани советрин халкьдиз гьикьван зиянар ганатIа, гьикьван инсанар къирмишнатIа ва хаинвилер авунатIа бегьем чизвачир. Анжах гила, Украинада Бандерани адан гъилибанар, дяведин вахтунда Гитлераз къуллугъ авур хаинар игитрин дережадиз акъудайла, «урус халкь кьена кIанда» лугьуз малумарзавайла, Россиядиз акси сиясат тухузвайла, гъавурда гьатзава. Украинадин кьилиз атанвай миллетбазар, цIийи фашистар Россияни, адан халкьарни аквадай вилер авачир халис душманар я.
И кар мад сеферда алай йисан 31-майдиз тестикь хьана. Миллетбазри Курскдин ва Брянскдин областра ракьун рекьерал алай муькъвер хъиткьинарна, пассажирар ва парар тухузвай поездар ярхарна. Ирид кас кьена. Вишелай виниз инсанриз хасаратвал гана. Гьар юкъуз Россиядин регионрин шегьеррал, хуьрерал, больницайрал, базаррал, школайрал чпик хъиткьиндай шейэр квай дронар ахъаюн тIимил акуна, гила муькъвер, поездар хъиткьинарзава, яшайишдин объектриз цIаяр язава.
Жергедин инсанар гъавурда акьан тийизвай агьвалатар я. Са патахъай, дяве акъвазарунин гьакъиндай меслятар ийиз, Туьркиядиз физва, маса патахъай, лап инсафсузвилелди терактар ийизва, шегьеррин винел дронар ахъайзава, Туьркиядивай ПВО-дин ва маса яракьар тIалабзава.
РагъакIидай патан дявекаррикай рахунни лазим къвезвач. Бинедилай Украинадин фашистриз гьикI куьмек гузватIа, гилани абуру чпини алчах кар давамарзава. Чпин шакIуртдиз элкъвенвай Зеленскийдиз пулар гуналди, гьар жуьредин хиве кьунралди, датIана гуьруьшар тешкилуналди, дяведин гьерекатар давамариз тазва. Кьулухъ иеси галай тартади хьиз, акатайдал гьужумзава. Къаст Россия магълуб авун я. И кар паталди «коллективный западди» Зеленский хьтин къабачи кьиле авай Украина са меденият, са дин гвай, са бинеяр авай Россиядиз душманвал ийидай чкадал гъанва. Кьве уьлкведин инсанарни пуч жезва, шегьерар, хуьрер харапIайриз элкъвезва, чилер, тамар алугарзава.
Дяве акъвазарун лазим я. Украина ва адан кьиле авайбур гьахьтин фикирдал гъидай кьетIен серенжемар герекзава.
Абад Азадов
