Алафар гьазурзава

2025-йисуз Дагъустандин аграрийри 1,5 миллион тонндилай гзаф векъи  алафар гьазурун пландик кутунва. Идакай РД-дин хуьруьн майишатдин ва недай суьрсетдин министерстводин телеграм-каналди хабар гузва. И кIвалах­рал чеб чпиз фидай (самоходные) ва тракторрин саки 600 косилка, 700-далай виниз «кIватIдай прессар» ва алафар кIватI хъийидай 65 комбайн желбда.

Республикадин хуьруьн майишатдин­ зегьметчийри тIебии къурухрай саки 1 миллион тонн векьер, 330 агъзур тонн —  гзаф йисарин, ва 180 агъзур тонн са йисан векьер кIватIуник умуд кутунва.

Алай вахтунда вири республикада саки 130 агъзур тонн векьер гьазурнава, идакай 70 агъзур тонн — Бабаюрт рай­онда.

Гъавурда акьазвайвал, дуьзенлух гзаф чкай­ра векьер ягъунив гатIуннава, и карди алафар пара кьадарда кIватIуник умуд кутазва­. Векьер кутугай вахтунда, абурук кфетлу, гужлу шейэр гзаф квайла, ягъун важиблу я.

Пландик кутунва

Яшайишдин догазификациядин прог­раммадин сергьятра аваз, Дагъустанда   8 агъзурдалай виниз хсуси кIвалерин сергьятрал газдин турбаяр тухванва. Идакай «Дагъустан патал газ» телеграм-каналди хабар гузва.

Чешмеди къейдзавайвал, алай вахтунда 5 агъзур кIвал газдалди таъминардай къурулушдик тамамдиз кутунва. КIвалерин сагьибри и кар патал герек тир тадаракар эцигнава, гьа жергедай яз — пичер, къазанар, гьахъ-гьисаб кьиле тухудай такьатар (счётчикар).

РД-да авай «Газпром межрегионгаз Махачкъала»­ ООО-дин регьбер Ризван Мурадова къейд­завайвал, алай йисуз мад саки 1,5 агъзур кIвализ газ тухун­ пландик кутунва.

Мукъаят хьуниз эвер гузва!

СФР-дин РД-да авай отделениди рес­публикадин агьалийриз мукъаят хьуниз ва лутуйрин фендерин есирда гьат тавуниз эвер гузва. Идакай идарадин сайтди кхьизва.

Чешмеди къейдзавайвал, эгер квез зенг авуна, вич Яшайишдин фондунин векил я лагьана, куь пенсия ва маса яша­йишдин выплатаяр чирун (уточнение) ва я гьахъ-гьисаб (перерасчет) хъувун патал куь хсуси делилар лугьун тIалабайтIа, абурун чIалахъ жемир!

И эвер гунихъ галаз сад хьиз, Махачкъала шегьердин агьалидин кьилел атай са дуьшуьшдикайни хабар гузва. ИкI, 68 йисан яшда авай Патимат Расуловади суьгьбетзавайвал, са касди адаз зенг авуна, вич Яшайишдин фондунин къуллугъчи я лагьана, паспортдин де­лилар, банкунин картадин­ номер ва хсуси кабинетдин пароль тIала­байла, ина са кар авайдал гьасятда адан шак фена. Дишегьлидин гафарай малум жезвайвал, вичиз и зенг атайдалай кьулухъ ада СФР-дин РД-да авай отделенидин сад тир контакт-центрадиз зенгна (теле­фондин нумра — 8-800-100-00-01) ва вичин кьилел атай дуьшуьшдикай абуруз хабар гана. Операторди П. Расуловади дуьз кIва­лах авунвайди тестикьарна ва адаз зенгнавайбур лутуяр тирдакай лагьана.

РД-да авай СФР-дин отделениди ри­кIел гъизва: малум тушир ва я шаклу нумрайрай зенг авурла, абуруз жаваб гумир­ ва таниш тушир ксариз садрани «Гос­къуллугърин» порталдин хсуси кабинетдиз гьахьдай пароль, паспортдин делилар, банкунин картадин номер ва адан ПИН-код лугьумир.

РД-да авай СФР-дин отделениди уп­равляющийдин везифаяр тамамарза­вай­ди тир А. Загьидовади раижзавай къейдерай гъавурда акьазвайвал, эгер квез телефондай зенгна, агьали кьилди кьабулун патал сиягьда тIвар кхьин, ахпа и гьерекат СМС-дин коддалди тес­тикьарун теклифзаватIа, гьакъикъат­да­ни, куьн лутуйрал расалмиш хьанва. Раижзавайвал, СФР-дин сайтда агьалияр патал «Виликамаз кхьин» («Предварительная запись») электронный къул­лугъ кардик ква, анай агьалидивай ­муьш­терийриз къуллугъдай чкадиз фин патал вичиз къулай югъ ва вахт хкягъиз­ жезва. Хабар гузвайвал, Яша­йишдин фондунин вири къуллугъар РД-да авай СФР-дин отделенидин муьштерийриз къуллугъдай сервисда, МФЦ-да ва я ­«Госкъуллугъар» порталда кьилиз ­акъудзава.

Гьазурайди — Муса  Агьмедов