Рахунрин 2-пай

2-июндиз Стамбулда Россиядинни Украи­надин векилрин арада кьвед лагьай сеферда рахунар кьиле фена. И сеферда кьве терефдини чпин теклифрин меморандумар малумарна ва сада-садав есирар вах­кунин меслятдал атана. Идакай «РБК» чешмеди хабар гана. Къейд ийин, идалай вилик кьве уьлкведин векилрин дестейрин арада Стамбулда 16-майдиз веревирдер хьанай. И сеферда рахунар са сятдилай гзаф вахтунда давам хьана.

Россиядин дестедин кьил Владимир Мединскийди­ гуьруьшдилай кьулухъ журналистриз ихтилат авурвал, сада-садаз меморандумар малумарунилай гъейри, къведай гьафтеда Россияди Украинадив 6 агъзур мейит вахкудай меслятдал атана.

Украинадин дестедин кьил Рустам Умерова вичин нубатда журналистриз малумарайвал, Россиядин тереф женгер акъвазарунин ва президентрин гуьруьш тешкилунин меслятдал атанач. Адан гафаралди, кьве тереф анжах сада муькуьдав телеф хьанвай 6 агъзур аскердин мейитар вахкунин икьрардал атана.

В. Мединскийди къейд авурвал, уьлквейрин арада сада-садав залан хирер хьанвай, заландиз начагъ аскерар вахкунин серенжемни кьиле фида. ГьакIни 18-далай 25 йисал кьван яшара авай вири есирар сада-садав вахкуда. «Гьа са вахтунда есирвиле авайбур вахкунин кьадарар кьве патайни вини кьил агъзур касдилай тIимил тушиз жеда, мумкин я, адалай гзафни хьун», — лагьана В. Мединскийди.

Умерован гафаралди, ада россиявийриз 20-июндилай 30-июндалди мад са гуьруьш кьиле тухун тек­лифна.

Украинадин гьакъиндай Россиядин меморандумдин текст «РИА Новости» чешмеди тамамдиз раижнава. Ам пуд паюникай ибарат я. Ингье адан асул метлеб куьрелди:

— Крым, ЛНР, ДНР, Запорожьедин ва Херсондин областар Россиядик акатун вири халкьарин дережада гьисаба кьун;

— Украинадин бейтерефвал малумарун, ам дявекар тешкилатрик экечIунивай къерех хьун;

— Украинада маса уьлквейрин военный кIвалахрал къадагъа эцигун;

— Украинадин ядерный тушир дережа;

— ВСУ-дин вини кьилин кьадар тайинарун;

— Россиядиз акси яз малумарнавай экономикадин санкцияр къуватдай вегьин;

— урус чIалал рахазвай халкьарин ихтиярар, азадвал таъминарун, УПЦ-дин (Украинадин православный килисадин) кIвалахдал эцигнавай сергьятар алудун, мил­летбазвал игитвилиз элкъуьрунал къадагъа эцигун;

— Украинадихъ галаз дипломатвилин ва экономикадин жигьетдай алакъаяр яваш-яваш гуьнгуьна хтун;

— женгинин гьерекатрихъ галаз алакъалу яз хьайи зараррин патахъай кьве терефдини наразивилер тавун.

Женгер акъвазарунин гьакъиндай 2 вариант теклифнава. Сад лагьайди: ДНР-да, ЛНР-да, Запорожьедин ва Херсондин областрин Россиядин мулкарай ВСУ ахкъудун.

Кьвед лагьайди:

— ВСУ (военный частар, соединенияр…) масанриз чукIурунал, цIийи кьилелай тайинарунал къадагъа эцигун, мобилизация акъвазарун ва демобилизация башламишун;

— военный рекьяй пуд лагьай уьлквейриз къаришмиш жедай рехъ тагун;

— Киевдиз къецепатан уьлквейрай гузвай военный куьмек акъвазарун;

— сиясатдин жигьетдай дустагънавайбуруз талукь яз кьве патани менефис малумарун ва кьунвай ватандашар азад хъувун;

— Киев Россиядиз акси диверсияр кьиле тухунивай къерех хьун;

— Украинада малумарнавай дяведин гьал къуватдай вегьин;

— дяведин гьал къуватдай вегьейдалай гуьгъуьниз 100 югъ алатайдалай кьулухъ Украинада сечкияр тухун.

ВСУ-дин терактар

Владимир Зеленскийди Россиядин аэродромриз акси яз авур терактрин гьакъиндай жавабдарвал СБУ-дин хиве туна.

Адан гафаралди, терроризмдин гьерекатдиз йисни зур идалай вилик гьазур жез башламишна. Ихтилат 1-июндиз ВСУ-ди Мурманскдин, Иркутскдин, Ивановодин, Рязандин ва Амурдин областра 117 беспилотникди объектрал гьужум авур терактрикай физва. Регионрин мулкариз абур пар чIугвадай машинраваз тухвана.

Гьазурайди — К. Ферзалиев