Мегьарамдхуьруьн райондин умуми образованидин мектебрин 11-классра кIелзавай жегьилрин арада Вирироссиядин физкультурадинни спортдин “Зегьмет чIугваз ва ватан хуьз гьазур я” фестивалдин муниципальный пай кьиле фена. Спортдин мярекат Ярагъ-Къазмайрин мектебда 12-февралдиз хьана.
Мектебра кIелзавайбурун арада ГТО-дин комплексдин нормативар кьабулун тестералди ахтармишдай центрайрин пландин бинедаллаз кьиле тухузва.
Мярекатдин иштиракчийри агъадихъ галай терефрай чпин гьазурлухвилин дережа раижна: 100 ва 200 метрдиз чукурун, яргъаз хкадарун, яракьдай лишанар ягъун, кросс ва икI мад.
Муниципальный паюна кьетIен алакьунар къалурайбур ГТО-дин ВФСК-дин республикадин дережада кьиле фидай паюна иштиракдай командадик кутада.
Республикадин пай 3-4-мартдиз Махачкъалада Е.Исинбаевадин тIварцIихъ галай стадиондал кьиле фида.
Спортдин мярекат райондин образованидин управленидихъ галаз санал тестералди ахтармишдай центрадин (МДЮСШ-1) пешекарри тешкилнавай, хабар гузва Мегьарамдхуьруьн райондин информациядин къуллугъди.
«Лезги газет»
