22-майдиз Москвада Государстводин Думадин майдандал «Дагъустандин халкьарин милли ирс хуьнин карда алай аямда вилик акъваззавай четин месэлаяр. Хайи чIалар ва культура хуьн» месэладай «элкъвей стол» кьиле фена.
Мярекат РФ-дин Государстводин Думадин депутат Сайгьидпаша Умаханован ва «Кавказдин халкьарин Россиядин конгресс» ООД-дин теклифдалди тешкилнавай. «Элкъвей стол» кьиле тухунин везифа «Кавказдин халкьарин Россиядин конгресс» ООД-дин председателрикай сад, журналист Руслан Къурбанова тамамарна.
Милли чIаларин месэла къенин юкъуз хцидаказ акъвазун Дагъустандин халкьарин жегьил несилрин векилрин арада хайи чIал чизвайбурун кьадар йикъалай-къуз тIимил хьунихъ галаз алакъалу я. ООН-дин международный стандартрин бинедаллаз, Дагъустандин чIехи пай халкьарин хайи чIалар гьеле гиламаз зайиф ва я гьатта михьиз квахьунин гьалда ава. Иллаки еке гьерекат идак Дагъустандин жегьилар РФ-дин чIехи шегьерриз, гьатта къецепатан уьлквейриз куьч хьуни кутазва.
Нетижада неинки чIалав вердишвал, гьатта милли культурадин эйнивални квахьзава. Ида лагьайтIа, гележегда Дагъустандин халкьарин адетар ва ацукьун-къарагъун михьиз терг хьунал гъида, гьисабзава мярекатдин тешкилатчийри. Абурун вилик и месэладай виридалайни чIехи пешекарар са майдандал кIватIунин ва веревирдер, хъсан тежриба раиж авурдалай кьулухъ арадал атанвай месэлаяр гьялдай сад тир рекьер тайинарунин месэла квай. Гьа икI, «элкъвей столдихъ» РФ-дин Государстводин Думадин депутатар, Федерациядин Советдин членар, федеральный ва регионрин государстводин къурулушрин къуллугъчияр, Дагъустандин халкьарин милли культурадин автономийрин регьберар, Кеферпатан Кавказдин халкьарин векилар, алимар, журналистар, юристар ва чIалан пешекарар, Россиядин кар алай вузрин студентар кIватI хьана.
Гуьруьшдал РФ-дин Государстводин Думадин депутатар тир С. Умаханов, Д. Гьасанов, А. Гьажиев, М. Гьажиев, гьакIни Госдумадин миллетрин крарай Комитетдин председателдин заместитель И.Гильмутдинов рахана. РФ-дин ДУМ-дин председатель, муфтий Равил Гайнутдинован тIварцIелай тебрикдин келимаяр «элкъвей столдин» иштиракчийрив адан заместитель Р.Сейфединова агакьарна.
Милли чIалар хуьнин жигьетдай чпин фикирар мярекатдал гьакIни «Адалатлу Россия» партиядин милли политикадин рекьяй секретарь Г. Омарова, миллетрин крарай Федеральный агентстводин Управленидин начальник А.Булатова, алимар тир К. Ландади ва М. Муртазалиева лагьана.
Хабар гузвайвал, «элкъвей столдин» кIвалахда гьакIни Россиядин Игит лагьай тIвар ва «Жуьрэтлувиляй» орден гуниз лайихлу яз гьисабнавай СВО-дин игитрини иштиракна. СВО-дин аскеррин тIварунихъ «Жуьрэтлувиляй» орденрин сагьибар тир М.Агьмедханов ва Х.Султанов, Кавказдин спортдин жемиятдин патай какахьай жуьредин (смешанный) кьуршахар кьунай тIвар-ван авай спортсмен М.Гьамзатханов рахана.
Лагьана кIанда хьи, асул гьисабдай и гуьруьшдин иштиракчийри идалай вилик, алай йисан 21-февралдиз, яни Хайи чIаларин международный юкъуз Махачкъалада кьиле тухвай «Дагъустандин халкьарин чIалар хуьнин ва виликди тухунин алай аямдин технологияр» темадай «элкъвей столдин» нетижайрал ва теклифрал амал ийизвай.
Амма кьетIен важиблувал мярекатдиз «элкъвей столдин» кIвалахда Дагъустандин вири халкьарин милли культурайрин автономийрин регьберри активнидаказ иштиракуни гана. «Гуьруьшдин виридалайни итижлу пайни гьа и ксари авур ихтилатар яз гьисабиз жеда – абуру кIватI хьанвайбуруз Дагъустандин хайи чIалар, культура ва адетар хуьниз талукь кьилди къачур проектар гьакъикъатдиз элкъуьрунин, уьмуьрдиз кечирмишунин тежрибадикай суьгьбетна», — къейдзава Р.Къурбанова.
Малум хьайивал, мярекат, санлай къачурла, итижлуди хьана. Адан эхирдай хайи чIал ва культура хуьнин карда иллаки активнидаказ иштиракзавайбуруз чухсагъулдин чарар ва тIварцIин (именной) стипендияр гана. Ихьтинбурун арада авай: авар, табасаран ва цIахур халкьарин милли автономийрин председателар тир Ш. Алибегилов, А. Рамазанов, Р. Алиев, С. Тарковскийдин фондунин векил И.Махтибегов, РКНГ-дин ООД-дин Къиргъизистанда авай векил Р. Усманов ва мсб.
Хабар гузвайвал, мярекатдикай хкатзавай нетижаяр ва гьакIни теклифар РФ-дин Президентдин Администрациядин, ФС-дин Федеральный Советдин, Государстводин Думадин талукь департаментризни комитетриз, СКФО-да РФ-дин Президентдин патай тамам ихтиярар ганвай векилдин офисдиз, РФ-дин ва РД-дин гьукуматриз, уьлкведин образованидин идарайриз рекье твада.
Жасмина Саидова
