Вилик пад кьазва
Украинадин яракьлу кьушунри алатай гьафтеда самолетдин жуьредин дронрин кьадар артухарна. Идакай «РИА Новости» чешмедиз Киевдин тахсиркарвилерин жигьетдай Россиядин МИД-дин кьетIен тапшуругъар тапшурмишнавай векил Р. Мирошника малумарна. Адан гафаралди, ихьтин дронар женгер кьиле физвай мулкарилай яргъа авай яшайишдин объектар ягъун патал ишлемишзава.
Р. Мирошника алава хъувурвал, 21-22-майдиз уьлкведин жуьреба-жуьре регионрин винел Россиядин ПВО-ди 485 беспилотник яна, абурукай 63 Москвадин областдал ахъайнавай.
Къейдзавайвал, ВСУ-дин беспилотникрин операторар Россиядин Яракьлу Къуватрин кьилин макьсадрикай я. Чи уьлкведин дронри-разведчикри душмандин дронар тайинарзава ва авиабомбайралди, артиллериядин яракьралди ва я ядай беспилотникралди абур тергзава.
26-майдиз РФ-дин оборонадин министерстводи малумарай делилралди, махсус серенжем кьиле тухунив эгечIайдалай инихъ Россиядин Яракьлу Къуватри Украинадин 663 самолет ва 283 вертолет, зенитный ракетайрин 607 комплекс, пилот галачиз лув гудай 59652 аппарат, 23594 танк ва дяведин маса машинар, РСЗО-дин 1564 машин, артиллериядин ва маса 25306 яракь, военный махсус 36001 автомашин тергна.
Рахунар мус ва гьина давам жеда?
Украинада авай къалмакъал къайдада тунин патахъай Стамбулда рахунар давамар хъувуникай гьелелиг веревирдер авун фад я. Амма Туьркиядин чIехи шегьер логистикадин, бейтерефвилин ва и уьлкведин тежрибадин жигьетдай кутугай майдан я. Ихьтин фикир «РИА Новости» чешмедиз Туьркиядин адалатлувилин ва еримлувилин партиядин векилди малумарна.
Туьркиядин МИД-дин кьил Хакан Фидана идалай вилик малумарайвал, Украинадин гьакъиндай рахунар давамарунин икьрардал атанва. Амма рахунрин кьвед лагьай пай кьиле фидай тайин вахт, чка гьелелиг малум туш. «Муракаб гьал фикирда кьурла, кьве терефди чпин веревирдер, меслятар ийизвайла, рахунар давамарунин кьвед лагьай камуникай якъин малуматар лугьуз жедач. Туьркияди бейтерефвал хуьзва ва арачивилин везифа кьилиз акъудиз алахъзава… Туьркиядин кьилин макьсад женгер акъвазарунал атун я», — лагьанва партиядин векилди.
Къейд ийин, уьлквейрин арада идалай вилик Стамбулда 16-майдиз рахунар кьиле фенай. Россиядин терефди рахунар мад давамариз гьазур тирди лагьанай.
Къуватсузвал гьиссна
Балтийский гьуьле Россиядин флотдин къуватар мягькем хьуникди Прибалтикадин уьлквейрик къалабулух акатнава. Латвиядик, Литвадик ва Эстониядик къурху акатунин себеб «Ягуар» танкер кьаз кIанз, амма авур алахъунар нетижасузбур хьунихъ галаз алакъалу я. Идакай «Лента.ру» чешмеди хабар гузва.
«Гьалар къизгъин хьунин хаталувал гьар юкъуз артух жезва», — къейднава Литвадин премьер-министр Г. Палуцкаса. Малумарзавайвал, танкердихъ галаз алакъалу агьвалатди РагъакIидай патан уьлквейрик велвела кутуна ва гьавиляй гуьгъуьнлай абуру Россиядин флотдиз аксивалдай цIийи рекьер-хуьлер жагъурдай мумкинвилер веревирдна.
Ихтилат 14-майдиз НАТО-дин куьмекдалди Эстониядин ВМС-ди це «Ягуар» танкер кьун патал авур алахъунрикай физва. И серенжемда Эстониядин катерди, гимиди, вертолетди, самолетди, гьакIни Польшадин ВВС-дин МиГ-29 истребителри иштиракна. Амма танкерди вичин гьерекат давамарна.
США-дик тахсир кутуна
Кеферпатан Кореяди США-дин президент Д. Трампа ракетайриз акси оборонадин «Къизилдин къуба» къурулуш арадал гъунин план нагьакьанди яз гьисабзава. Идакай «Bloomberg» чешмеди хабар гузва.
«Программа США-дин стратегиядин тереф хуьзвай, са терефди агъавалдай космосдин ядерный дяведин сценарийдикай ибарат я», — лагьанва Кореядин кьилин телеграфдин агентстводин малуматда.
Идалай вилик Россиядин МИД-дин кьилин заместитель Сергей Рябкова Америкадин «Къизилдин къуба» къурулушдикай хьун мумкин тир къурхудиз къимет ганай. Адан гафаралди, ракетайриз акси оборона арадал гъунин рекьяй США-дин планар гьарай-вургьай твадай себебриз элкъвенвач.
Гьазурайди — К. Ферзалиев