24-майдиз республикадин 1269 мектебдин выпускникар патал эхиримжи зенг яна. 11-классар акьалтIарнавай 12 агъзур жегьил ва 9-классар куьтягьнавай 45 агъзур жаван патал ам мектебда кIелдай йисар тамамдаказ акьалтIарнавайдакай хабардарзавайди хьана. КIелдай йис акьалтIарунин лишан яз, адет хьанвайвал, республикадин вири мектебра шад мярекатар линейкаяр кьиле фена.
Тарсар, кIвалин ва ахтармишдай кIвалахар, тапшуругъар, имтигьанрин вилик, рикIик къалабулух кваз, ахвар текъведай йифер — гила абур вири гьамишалугъ аялрин рикIел аламукьдай тарихдин чинар я.
«Школади квез неинки чирвилер, гьакIни вичихъ къимет авачир кьван багьа тежриба гана: ина квез сада-садахъ галаз дуствилин алакъаяр тайинариз, сад масадан гъавурда гьатиз, кефи хайи касдилай гъил къачуз, вилик еке макьсадар эцигиз ва абурув агакьариз чирна. Ина куьн чIехи, бегьем, тамам хьана, дуьньядикай ва жуван мумкинвилерикай куь сифте фикирар арадал атана. Ингье гила, мектебда кIелдай вахт акьалтIайла, куьне уьмуьрдин цIийи чиниз кам къачузва — ада куьн вичин мумкинвилералди желбзава, гьа са вахтунда еке жавабдарвал, жуьрэтлувал, къастунал кIевивал истемишзава. Куь вилик гьеле цIийи имтигьанар кума — государстводин имтигьанар ва гзафбур патал вуздик экечIун. Им куь гележег патал важиблу кам я. Амма рикIел хуьх: гъалатIрихъай кичIе жемир ва жуван къуватрихъ гьамиша инанмиш хьухь. Играми жегьил-жаванар! Вири и йисара куь патав хьайи ксар садрани рикIелай ракъурмир: квекай гьар садав чпин рикIин, руьгьдин пай вугай куь муаллимар. Чун квехъ гьар садахъ инанмиш я. Дагъустанди квел дамахзава ва куь гележегдин агалкьунар гуьзлемишзава. ВикIегьдаказ виликди алад. Намуслубур, зегьметдал рикI алайбур хьухь ва гьамиша лайихлу инсанар яз амукьа. Еке уьмуьрда куь бахтуни гъурай!» — рекье твадай гафар лугьузва РД-дин образованидин ва илимдин министерстводи, выпускникрихъ элкъвена.
Къейд ийин хьи, эхиримжи зенг ягъунихъ галаз алакъалу шад мярекатра муниципалитетрин кьилери, администрацийрин векилри иштиракна. ИкI, Кьурагь райондин кьил Замир Азизова КIирийрин хуьруьн Россиядин Игит З.Батманован тIварунихъ галай юкьван мектебдин шад мярекатда иштиракна. Мегьарамдхуьруьн райондин кьил Фарид Агьмедова Оружбайрин хуьруьн аялриз тебрикдин ва насигьатдин гафар лагьана.
Ахцегь райондин мектебри алай йисуз 9-классар акьалтIарай 295 жаван ва 11-классрин 106 выпускник чIехи уьмуьрдиз ахъайна. Абурун чкадал райондиз мектебрин 1-классриз, хабар гузвайвал, 178 аял атанва. Райондин кьил Абдул-Керим Палчаева жегьил-жаванриз тебрикдин гафар Россиядин Игит Мегьамедали Мегьамеджанован тIварунихъ галай Луткунрин юкьван мектебдин майдандилай лагьана.
«Чна умуд кутунва хьи, играми жегьилар, са шумуд йис алатайла, куьн райондин идарайриз пешекарар яз, кIвалахиз хкведа. Куьн и район вири уьлкведиз машгьур авур баркаллу рухвайринни рушарин невеяр тирди гьич са декьикьадани рикIелай ракъурмир. Къуй абурун баркаллу крар куь рекьериз ишигъ гудай чирагъдиз элкъуьрай» — лагьана А-К.Палчаева. .
СтIал Сулейманан райондин мектебри алай йисуз 11-класс акьалIарай — 236 ва 9-классар куьтягьай 640 аял ахъайна. Гила абуру чпин гележегдин пешейрин рекьер хкягъун ва и жигьетдай чирвилерин цIийи кукIушар муьтIуьгъарун лазим я. Насигьатдин чими келимаяр абуруз райондин администрациядин ва жемиятдин векилри, муаллимри ва диде-бубайри лагьана. Районрин хуьрера кьиле фейи линейкаяр «чирвилерин куьлег» мектебриз сифте камар къачузвай бицIекрив вахкуналди акьалтIна.
Саида Мурадова
