Мектебра кIелунин цIийи йис башламиш хьайивалди, аялрин диде-бубаяр образованидин тешкилатри гун тийизвай бязи ктабар чпи жагъурунин къайгъуйрик жезва. Сир туш, Дагъустандин мектебар герек тир ктабралди тамамдаказ таъминариз хьанвач. Гьавиляй диде-бубаяр ктабар туьквенрай ва я танишривай жагъурунин, маса къачунин суракьда жезва. Хайи чIаларин ктабрихъ галаз алакъалу месэла бешбетерди я – абур туьквенрай маса къачудай мумкинвал авач. Гьавиляй гзаф муаллимри, хайи чIалаз чара ийизвай тарсарин кьадар йисалай-суз тIимил хьунихъ галаз сад хьиз, ктабар кьит хьунин месэлани лап хциди, чараяр акуна кIанзавайди яз гьисабзава.
Лезги чIалан ва эдебиятдин ктабрин патахъай чна А.Тахо-Годидин тIварцIихъ галай педагогикадин илимдинни ахтармишунрин институтдин къуллугъчи Жаклина Мейлановадивай малуматар гун тIалабна. Ада къейд авурвал, алай йисуз лезги чIалан ва литературадай кIелунин ктабар мад сеферда чапдай акъуд хъувунва. Кьилди къачуртIа, букварь 1160 экземплярдин кьадарда аваз, 1-класс патал литературадай кIелунин ктаб – 1092, 2-класс патал литературадай кIелунин ктаб – 1100, 3-класс патал литературадай кIелунин ктаб – 617, 4-класс патал литературадай кIелунин ктаб – 3313, 1-класс патал лезги чIалан ктаб – 1042, 2-класс патал лезги чIалан ктаб – 1138, 3-класс патал лезги чIалан ктаб – 1037, 4-класс патал лезги чIалан ктаб – 1181, 5-класс патал лезги литературадин ктаб – 2954, 5-класс патал лезги чIалан ктаб – 1359.
Хъсан хабаррикай мад сад ам я хьи, фадлай вилив хвейи 6-класс патал лезги чIалан (авторар – Ж.Мейланова, Гь.Рамалданова, Р.Тажибова) ва лезги литературадин (авторар – Къ.Акимов, С.Акимова) ктабарни цIи 4781 ва 4780 тиражар аваз чапдай акъатнава.
Къейд ийин, къалурнавай рекъемрай игьтияж таъминарунин процентдикай чавай гьелелиг малумат гуз жедач.
Лезги Фетгьуьллагь
