877 миллион манат – кьве шегьердиз

Дагъустандин Огни ва Къизилюрт шегьеррин чимивилелди­ таъминардай къурулушар цIийи хъувунин серенжемриз 877 мил­лион манат харж ийида. Идакай РД-дин эцигунрин­, архитек­турадин ва ЖКХ-дин министерстводин пресс-къуллугъди хабар гузва.

Ведомстводи къейдзавайвал, къазанханаяр капитальный къайдада цIийикIа туькIуьр хъувунин и серенжемриз пулунин та­кьатар республикади авадан авунин милли фондунай къачуда.

ИкI, Къизилюрт шегьерда модульный кьве къазанхана ва 17 километрдин кьадарда чимивал гудай сетар михьиз дегишарун пландик кутунва.

Дагъустандин Огни шегьерда 8 къазанхана капитальнидаказ цIийи ва 3 километрдин кьадарда чимивал гудай сетар дегишар хъийида. Вири и кIвалахар 2024-йисуз акьалтIарун пландик кутунва.

Региондин гьукумдаррин делилралди, санлай къачурла,  ЖКХ-дин кьилин фондарин умуми кьадардикай, юкьван гьисабдалди, 70 процент гьалдай фенва.

ЦIийи цех эцигда

Дагъустанда 2025-йисуз къушариз ва балугъриз ем гьазурдай  цех арадал гъун пландик кутунва. Кархана йиса 6 агъзур тонндив агакьна суьрсет гудайди жеда. Идакай «Дагъустандин экономика» телеграм- каналди, РД-дин балугърин майишатдин комитетдал асаслу яз, хабар гузва.

«Дидагрика» ООО-дин и проект уьмуьрдиз кечирмишуниз талукь харжияр 700 миллион манатдиз барабар жеда. Ам кьилиз акъудун патал регионди инвестордив 4 гектардикай ибарат чилин чка вуганва.

Комитетда къейд авурвал, и проект 2023-йисан эхирдалди башламишун пландик кутунва. Ам кьилиз акъудунин оператор республикада 2022-йисуз арадал гъанвай ООО «Дагфи» компания жеда.

8,2 процент артух хьанва

Алай йисан 8 вацран муддатда Дагъустандин ракьун рекьерин улакьриз 878 агъзур тонндив агакьна пар янава (погрузка), им, алатай йисан январь-август варцарив гекъигайла, 8,2 процентдин гзаф я.

СКЖД-дин (Кеферпатан Кавказдин ракьун рехъ) делилралди, 2023-йисан сифтегьан 8 вацра ихьтин парар янава:

— эцигунардай затIар – 632 агъзур тонн (3,1 процент гзаф хьанва);

— регъведай суьрсетар – 95 агъзур тонн (2,3 сеферда гзаф хьанва);

— техилар – 13,5 агъзур тонн (6 сеферда гзаф хьанва);

— картуфар, салан майваяр ва емишар – 10,5 агъзур тонн (20 сеферда гзаф хьанва).

КьатI хьайи гъил къутармишна

КIвалахдайла хатасузвилин серенжемар вилив хуьн тавур­ла­, туькьуьл нетижаяр арадал къведай дуьшуьшарни жеда­. ИкI, жегьил итимди, мукъаятвал хуьн тавуна, болгаркадив кIва­лах­дайла, хатадай вичин гъилин кфилдилай (предплечье) кьатI­на. Ам хамуникай куьрс хьана амай. Идакай РД-дин здравоохраненидин министерстводин телеграм-каналди хабар гузва.

Бахтунай, республикадин травматологиядин ва ортопедия­дин центрадин хирургрилай ам къутармишиз алакьна. Тади­ гьалда кIватIай бригадади, тканрин некроз алукьдалди, кIа­рабрин кIусарин ва дамаррин битаввал арадал хкана. Иви къекъуьнин кар нетижа гудай къайдада чкадал хкана, гила гъил къутармиш хьайи кас нубатдин реконструктивный операциядиз гьазур жезва.

Ихьтин операцияр кьетIенбур я, амма и центрада абур сад лагьай сеферда туш кьилиз акъуднавайди. Алай девирдин технологиядин ва вини дережадин пешекарвал авай духтуррин куьмекдалди гьатта ерли кьатI хьайи гъилни чкадал хкиз, яни къутармишиз алакьзава.

Са тIимил агъуз аватнава

Официальный статистикадин делилралди, шартIуналди тир лап агъа кIан «продуктрикай ибарат набордин» къимет­ 2023-йисан августдиз Дагъустанда 0,5 процентдин ужуз хьанва­­. ИкI, адан кьадар 5 агъзурни 555 манатдиз барабар я. Идакайни «Дагъустандин экономика» телеграм-каналди хабар гузва.

СКФО-дин регионрикай Чечняда продуктрикай ибарат на­бор  виридалайни багьа я – 5,9 агъзур манат. Кабардино-Бал­карияда  виридалайни ужуз я – 5,2 агъзур манат. Шар­тIу­налди гьисабзавайвал, вацран муддатда инсандал гьалтзавай­ лап агъа кIан продуктрин сиягьдик акатзава: саки 15 килограмм фу ва чIахар, 12,5 килограмм картуфар, 1,5 килограмм емишар ва гьакьванни ширинлухар, саки 3 килограмм як, 1,2 килограмм балугъ, 18 килограмм некIедин суьрсетар.

Гьазурайди – Муса Агьмедов