Дагъустан Республикадин Гьукуматдин Председателдин заместитель Рамазан Жафарован регьбервилик кваз РД-дин наркотикриз акси комиссиядин заседание кьиле фена. Анал къадагъа авунвай шейэр законсузвилелди ишлемишуниз акси серенжемар тухунин месэла веревирдна. Идахъ галаз сад хьиз, мярекатдал республика патал важиблу маса месэлайрикайни ихтилат кватна.
Сад лагьай месэладиз талукь докладар МВД-дин полициядин начальникдин заместитель Агьмед Къулиева, Дагъустандин таможнядин начальникдин заместителдин везифаяр тамамарзавай Иса Гьасаналиева ва РД-дин прокурордин заместитель Сергей Кузнецова авуна.
Агьмед Къулиева малумарайвал, гъилевай йисан 8 вацра къайдаяр хуьдай органри законсузвилелди наркотикар ишлемишуниз талукь 1454 тахксиркарвал дуьздал акъудна. Абурукай 585 тахсиркарвал лап заланбур тир. Аквазвайвал, наркотикар ишлемишзавайбурун, гегьеншарзавайбурун кьадар тIимил жезвач. Республикада 11 наркопритон авайди малум хьана. Къадагъа авунвай шейэр маса гузвай 584 дуьшуьш дуьздал акъудна.
2023-йисуз Иран Республикадай «анаша» ва «марихуана» дашмишиз кIанзавай инсанар кьуна ва абурулай уголовный дело къарагъарна. Къайдаяр хуьдай органри дуьздал акъудай тахсиркарвилерай 1443 уголовный дело къарагъарна ва 1038 уголовный дело суддиз рекье туна.
Къадагъа авунвай шейэр информациядинни телекоммуникациядин технологийрин куьмекдалди ишлемишзавай, маса гузвай 111 тахсиркарвал малум хьана. Йисан сифте кьилелай сентябрдалди гьа и жуьредин тахсиркарвал ийизвайбурулай къайдаяр хуьдай органриз 1136 хабар атана. Ахтармишунар авурдалай гуьгъуьниз 1006 уголовный дело къарагъарна.
Къайдаяр хуьдай органрин, таможнядин ва прокуратурадин къуллугъчийрин алахъунралди Россиядин регионрай республикадиз наркотикрин лап къуватлу шейэр гъизвай чIехи 17 каналдин вилик пад кьуна. Нетижада 7 килограммдилай виниз наркотикар ва 9 килограммдив агакьна СДВ (бедендиз пис таъсирдай шейэр) вахчуна. Йисан сифтедилай къадагъа авунвай шейэр законсузвилелди ишлемишзавай 932 кас кьуна.
Мярекатдин эхирдай Рамазан Жафарова наркотикриз акси комиссиядин заседанидин нетижайриз килигна талукь серенжемар кьабулдайдакай лагьана. Республикадин къенепатан крарин министерстводал наркотикрал машгъул тахсиркаррин дестейрин кIвалах акъвазардай ва къадагъа авунвай шейэр законсузвилелди ишлемишзавай дуьшуьшар дуьздал акъуддай алава серенжемар кьабулун тапшурмишна.
Хийир Эмиров
