Алатай гьафтеда Докъузпара райондин администрациядин дараматда «Лезги газетдин” редакциядин “Хайи чIал хуьн” проектдин сергьятра аваз акъуднавай «100 тапшуругъ» ва “Лезги чIал чирин” ктабрин презентация кьиле фена.
Мярекатда Докъузпара райондин кьилин заместитель Салигь Гьажимурадова, “Лезги газетдин” кьилин редактор Мегьамед Ибрагьимова, райондин образованидин управленидин начальник Руслан Исмаилова, ИМЦ-рин руководитель Мадрид Магьмудова, мектебрин директорри, СМИ-дин векилри иштиракна.
М.Ибрагьимова презентациядин иштиракчийриз “Хайи чIал хуьн” проект гьикI арадал атайди ятIа ихтилатна, ктабрин кьетIенвилер, аялриз дидед чIал чирунин карда абурухъ авай метлеб къейдна.
Ада гьакIни редакцияди “Лезги чIалан ктабар — мектебриз” серенжем кьиле тухузвайдакай ва адан сергьятра аваз бине Къаракуьредай тир карчи Абдельнасир Рамалданова Докъузпара райондин мектебра 1-классра кIелзавай аялриз паюн патал вичин такьатрихъ гьар са ктабдикай 215 экземпляр маса къачунвайдакай хабар гана.
“Эхиримжи йисара чпихъ мумкинвилер авай гзаф ватанэгьлийри хайи чIалаз, милли медениятдиз фикир гузва, жуьреба-жуьре мярекатар (олимпиадаяр, конкурсар) тешкилуниз пулдин такьатар чара ийизва. А.Рамалдановани, хайи райондин мектебриз ктабар маса къачуналди, лезги чIал хуьник вичин пайни кутунва. Къуй ахьтин кьегьалар чи арада гзаф хьурай”, — лагьана М.Ибрагьимова.
РикIел хкин, ихьтин серенжем мартдин эвел кьилера СтIал Сулейманан райондани кьиле фенай.
С.Гьажимурадова хайи чIал хуьнин макьсад авай гьар са кам, гьар са гьерекат важиблу тирди ва и жигьетдай “Лезги газетдин” редакцияди кьиле тухузвай кIвалах тариф авуниз лайихлу тирди къейдна. Ада гьакIни хайи чIал хуьник еке пай кутунай ва аялриз ктабар савкьат авунай райондин администрациядин патай Абдельнасир Рамалдановаз сагърай лагьана.
Агьмед Магьмудов
