И йикъара, 91 йисан яшда аваз, фадлай Пенза шегьерда яшамиш жезвай лезги гьикаятчи, шаир, РФ-дин МВД-дин отставкада авай майор, хейлин йисара къанун-къайда хуьдай органра кIвалахай Садко (Садикь) Абумуслимович Гьажиев рагьметдиз фена.
Бине Кьурагь райондин КIирийрин хуьряй тир С.А.Гьажиев 1931-йисуз дидедиз хьана. 1947-йисуз ам Бакудиз фена, “Артемнефть” тIвар алай карханада сифте слесарь, гуьгъуьнлай механик, комсомолрин тешкилатдин секретарь яз зегьмет чIугуна.
1954-йисуз кIириви СССР-дин МВД-дин Ленинградда авай военно-политический училищедиз гьахьна. Анаг акьалтIарай 1961-йисуз ам Пензадин областдин УВД-диз акъатна. Ина жегьил офицерди отряддин, колониядин режимдин паюнин начальникдин везифаяр тамамарна.
Садикь Гьажиева 1968-йисуз марксизмдин-ленинизмдин университет акьалтIарна, хейлин йисара МВД-дин органра, УИН-дин къурулушда къуллугъна. 1988-йисуз, майордин чинда аваз, кIвалахдивай къерех хьана. 25 йисуз къанун-къайда хуьдай органра намуслувилелди къуллугъ авунай С.Гьажиев “МВД-дин хъсан къуллугъчи” знакдиз, “РФ-дин УИС-дин къурулуш вилик тухунай” къизилдинни гимишдин ва хейлин маса медалриз, грамотайриз, савкьатриз лайихлу хьана. Ватандин ЧIехи дяведин ветеранди кьве веледдиз — хцизни рушаз тербия гана.
Кьисметди хайи хуьруьвай яргъаз — Пенза шегьердиз акъуднатIани, Садикь Гьажиева багъри ерийрихъ галаз авай алакъаяр кьатIнач. Ам мукьвал-мукьвал КIиридиз хкведай, мукьва-кьилийрал кьил чIугвадай, вичин нубатдин ктаб патал материалар кIватIдай. Асул кIвалах къанун-къайда хуьдай органрихъ галаз алакъалу хьанатIани, адаз Аллагьди яратмишдай пай ганвай. 1954-йисалай адан эсерар “Коммунист” газетдиз, “Дуствал” альманахдиз акъатзавай. 1978-йисуз писателдин къелемдикай Советрин Союздин Игит Эсед Салигьоваз бахшнавай, шиирралди кхьенвай “Дагъларин хва” роман хкатна. Гуьгъуьнлай ада “КIири Буба”, “Дагълар шагьидар я” ва маса романар, цIудралди поэмаяр, вишералди шиирар кхьена. Абурукай гзафбур лезги ва урус чIаларал кьилдин ктабар яз чапдай акъатнава. Адан яратмишунрин жебеханада гьеле чапдай акъат тавунвай 4 ктаб ама.
Садикь Гьажиев вичин хайи хуьре — КIирида кучукнава.
“Лезги газетдин” редакциядин коллективди рагьметлудан хизанриз, вири мукьва-кьилийриз башсагълугъвал гузва. Адан экуь къамат чи рикIера амукьда.
