Чи ватанэгьлияр — гьар сана
Намик Ферзалиевахъ галаз зун “Фейсбукда” фадлай таниш я. Итижлу делил ам я хьи, чи фамилияни сад я, хайи хуьруьн тIварни.
Ферзалиев Намик Камалан хва 1964-йисан 12-августдиз Азербайжан республикадин Исмаиллинский райондин Къалажухрин хуьре (и тIвар алай бинелу хуьр Докъузпарада, ибурулайни гъейри, пуд лагьай хуьр КцIар райондани ава) дидедиз хьана.
Намик 6-классда авайла, адан хизан къуншидаллай Смугъулрин хуьруьз (АР-дин Исмаиллинский район) куьч хьана. Адан чIехи буба алатай асирдин 20-йисара Докъузпара райондин Къурушрин хуьряй Азербайжандин лезги хуьрериз хайи чIал чирун патал ракъурнавай. ИкI, Яламадилай гатIунна, Исмаиллинский райондиз кьван фена, и магьалдин Къалажух, Смугъул хуьрерин мектебра муаллимвиле, директорвиле кIвалахна.
Хайи ватандиз — Къурушдал — хъфиз кIан хьанатIани, кьисметди ахьтин мумкинвал ганач. Къурушвияр дуьзендиз куьч хьайивиляй Намикан чIехи бубади элкъвена ватандиз хъфиник умуд кухтунач. ИкI, 1958-йисуз ада Исмаиллинский райондин Къалажухрин хуьре кIвал эцигна, ана бине кутуна. Адан бубади кьуд хуьруьн чIехи колхозда кьилин агрономвиле, седривиле кIва-лахна. Хизанда кIуьд веледни чIехи авуна.
Мектеб куьтягьай Намик АзИНЕФТЕХИМ-дин прикладной математикадин факультетдик экечIна. Яракьлу кьушунрин жергейриз эвер гайила, ватандин вилик буржи тамамарна. Гуьгъуьнлай ада вузда кIелун давамар хъувунач. Москвадиз фена, кьве имтигьан вахкана, ам цIийи кьилелай автомобилрин рекьерин институтдик (МАДИ) экечIна. Анаг куьтягьайдалай кьулухъ Советрин уьлквени чкIана. Намик 1993-йисуз пешедин рекьяй кIвалахун патал Екатеринбург шегьердиз фена. Ина адаз амукьайди вичин хсуси карчивилел машгъул хьун я.
Намик Ферзалиева вичин уьмуьрдин юлдашдихъ галаз санал хизанда кьве велед — рушни хва — чIехи авунва. Абуру УРФУ (Уралдин гьукуматдин федеральный университет) куьтягьнава. Руша банкда кIвалахзава, гадади магистратурада кIелун давамарзава.
Намик Ферзалиева хиве кьазвайвал, ам гьеле мектебда кIелзавай чIавалай азербайжан чIалал шиирар теснифунал машгъул хьана.
“Интернет себеб яз, заз жуван лезги чIалални кхьиз чир хьана. Пуд-кьуд йис кьван я за лезги чIалал шиирар теснифиз”, — лугьузва Намика.
Малум хьайивал, 2017-йисуз адан шииррин ктабни чапдай акъатнава. Исятдани адан яратмишунрин чантада мадни гзаф шиирар кIватI хьанва. Ам литературадин чIалан къайдайрал амал авунин терефдар я, гьавиляй адаз вичи кхьизвай гьикаяярни (эхиримжи вахтара ам гьикаятдални машгъул я) литературадин чIалав кьурбур хьана кIанзава. Къейдна кIанда хьи, мектебда лезги чIалан тарсар такунвай ватанэгьлидиз чапдай акъудиз кIанзавай гьикаяйрин кIватIалдик хайи чIалан орфографиядин жигьетдай гъалатIар хьана кIанзавач. “И жигьетдай заз хъсан шаир, пешекар Пакизат Фатуллаевади редакторвилин куьмек гун хиве кьунва”, — лугьузва Намик Ферзалиева.
Гъурбатда хайи чIалахъ, милливилихъ ялзавай ватанэгьлидихъ чаз анжах сагъвал ва агалкьунар хьана кIанзава.
К.Ферзалиев
