Мергьяматлувал
Республикадин гзаф чкайра хьиз, Сулейман-Стальский райондани сагълам уьмуьр, спорт таблигъ авунин серенжемар, крар датIана дикъетдик кутазва. Райондин 90 йисан юбилейдихъ галаз алакъалу яз, “90 мергьяматлу кар — райондин юбилейдиз” лишандик кваз, мумкинвилер авай ватанэгьлийри и ва я маса регьимдин крар тамамаруналди, ватандизни агьалийриз чпин къайгъударвални жумартвал къалурзава.
ИкI, райондин сайтди раижзавайвал, и йикъара Уллу-Гъетягърин хуьряй тир Энрик Гьуьсенбегова вичин такьатрихъ ватанда спортдин цIийи майдан туькIуьрна. Майдан жуьреба-жуьре турникралди ва куьчедал спортдал машгъул хьун патал лазим тир маса тадаракралди таъминарнава. Адалайни гъейри, спортдин майдандал кьезил атлетикадал, художественный гимнастикадал машгъул жедай мумкинвал ава.
Жаванриз чпин азад вахт сагъламвал патал менфятлудаказ кечирмишдай мумкинвал гайи мергьяматлу ватанэгьли Энрик Гьуьсенбеговаз хуьруьнвийри алхишдин гафар лугьузва.
Спортдин хилез чпин хсуси такьатар серфзавай заха ватанэгьлияр райондин хуьрера тIимил авач. Абурун крарикай мукьвал-мукьвал чав хабарар агакьзава. Чешмеди къейдзавайвал, райондин жегьилрин арада спорт югъ-къандавай машгьур жезва. Эхиримжи йисара ана пайда хьайи спортзалра вердишвилерни чирвилер къачузвай пагьливанри дуьньядин дережайра агалкьунарни къазанмишзава.
«Лезги газет»
