Тайин мурадрихъ элкъуьрнавай “Хуьрерин мулкарин алай аямдин къамат” программадин сергьятра аваз 2020-2021-йисара Ахцегь ва Сулейман-Стальский районар вилик тухун патал 1,2 миллиард манатдилай виниз такьатар чара ийида. Идан гьакъиндай республикадин Кьилин ва Гьукуматдин Администрациядин пресс-къуллугъди хабар гана.
Дагъустандин Минсельхозпродда кьиле тухвай совещанидал тайин мурадрихъ элкъуьрнавай программадин сергьятра аваз хуьрерин чкаяр комплекснидаказ вилик тухуниз талукь проектар хкягъунин месэла веревирдна.
“Дагсельхозстройдин” директор Мегьамед Юсупова малумарайвал, республикадин кьве райондин мулкарал яшайишдихъ галаз алакъалу ва инженерный къурулушрин имаратар эцигун ва абур алай аямдин тадаракралди таъминарун пландик кутунва.
Программадин асул макьсад ФАП-ар хуьрерин агьалияр патал 6 километрдилай гзаф яргъаз къакъатнаваз тахьун таъминаруникай, хуьрерин 95 процент агьалийриз интернетдикай менфят къачудай мумкинвал гуникай ва 80 процентдив агакьна агьалияр хъвадай целди таъминаруникай ибарат я.
«Лезги газет»
