Дагъустанви Хабиб Нурмегьамедованни ирландви Конор Макгрегоран бягьс кьиле финикай рахунар аваз гзаф вахт тир. Пагьливанри чпини мукьвал-мукьвал фикирар раижзавай. Ирландвиди Хабибак, гьатта вири дагъустанвийрик, мусурманрик хкьадай келимаярни лагьана. Турнирдилай вилик кьиле фейи пресс-конференциядал, заланвал алцумарунин серенжемдани Конора чи спортсмен пертзавай, ам къалриз акъудзавай. Амма Хабиба сабур, секинвал хвена, вахт атайла рингдал дуван аквадайди лагьана.
7-октябрдиз гьеле экв ахъа тахьанмаз Дагъустандин шегьеррин майданрал, кинотеатррин вилик, кьилин куьчейра Хабибан терефдарар кIватI хьанвай, чIехи экранрилай турнирдин бягьсер къалуриз эгечIна. UFC 229 турнирдин кар алай ва вири дуьньяди гуьзетай бягьс сятдин муьжуьдан зураз башламишна. Гьа сифте раунддилай башламишна Хабиба кIвачел акъвазна, кIаник кутуна, гъутар илигна, Конор кукIварна ва 4-раундда ам бамишарна, ирландвиди вич ахъаюн тIалабна. Дагъустанвийрин шадвилихъ кьадар авачир. Куьчейра кIватI хьанвай агъзурралди терефдаррин вилик Хабибан буба, Америкадиз бягьсиниз килигиз фидай ихтияр тагай Абдулманап Нурмегьамедов экъечIна, баянар гана.
Къейд ийин, Конора ва адахъ галайбуру Хабиб авай автобусдални гьужумнай, намусдик хкьадай гафарни лагьанай. Вири и крар фикирда аваз Хабиба Конор кукIварайдалай кьулухъ, залда авай адан са терефдардизни вегьена. Хабибан стха ва мад кьвед рингдиз экъечIайла Конора абурукай сад яна. Хабибан командадай тир пудни гьакI акъвазнач, Конорал гъутар гьалчайдалай кьулухъ абур полицияди кьуна. Рингдал хтай Хабиб, и крар себеб яз, чIул гвачиз ва гъалиб хьанвайди малумар тавуна хъфена. Спортсменар хъфейдалай кьулухъ, Хабиб гъалиб хьанвайди ва чIул адав гумукьзавайди малумарна. Полицияди кьурбурни, Конора вичи арза тийизвайди лагьайдалай кьулухъ ахъай хъувуна, амма гьуьжетар гьеле куьтягь хьанвач. Конора вичиз Хабибахъ галаз кьисас вахчудай бягьс тухуз кIанзавайдакайни лагьанва.
Хабиб Нурмегьамедоваз РФ-дин Президент Владимир Путина, Дагъустандин Кьил Владимир Васильева, дуьньяда машгьур спортсменри, политикри, Россиядин бязи регионрин кьилери ва гзаф масабуру тебрикар авунва.
Чемпионвилин тIвар, чIул хвейи Хабиб Нурмегьамедов 8-октябрдиз ватандиз хтана. Ина ам чIехи гьуьрметдивди къаршиламишна. Терефдаррихъ галаз Хабиб “Анжи-Арена” стадиондал гуьруьшмиш хьана.
Инал Хабибаз гьам республикадин регьберрин, гьам жергедин агьалийрин патай гзаф тебрикар авуна. Вирида адаз садрани кумукь тавуна бягьсер давамарун алхишна.
Мярекатда вахтуналди Дагъустан Республикадин Гьукуматдин Председателдин 1-заместителдин везифаяр тамамарзавай Анатолий Къарибова, РД-дин спортдин ва физический культурадин министрдин везифаяр тамамарзавай Мегьамед Мегьамедова ва масабуру иштиракна.
Чемпионди вич икI къаршиламишунай, бягьс кьиле фейи вахтунда куьчейра, паркара ва кинотеатрра кIватI хьана, вичин тереф хуьнай сагърай лагьана.
Гьазурайди — Дагъви Шериф
