Вири уьлкведа Муаллимдин югъ къейдзавай 5-октябрдиз Кьурагь райондин уьмуьрда лишанлу вакъиа кьиле фена: Советрин Союздин Игит Эсед Салигьован тIварунихъ галай умуми образованидин юкьван мектебдин 100 йис къейдна.

Гьавади дагълара зул тамамдиз вичин ихтиярда гьатнавайди къалурзавай. Амма марфади, гару, мекьивили мярекат чешнелудаказ кьиле тухуниз манийвал ганач. Экуьнилай игитрин ватандиз кьуд патахъай мугьманар ахмиш жезвай. Сятдин 11-даз абур вири хуьруьн юкьвал алай мектебдин гьаятда кIватI хьана. КIири­вийриз шад вакъиа мубаракзавайбурун арада Кьурагь райондин кьил Замир Азизов, райондин прокурор Фируза Лагъметова, педагогвилин зегьметдин ветеран, хейлин йисара мектебда математикадин муаллим яз зегьмет чIугур Муьгьуьббат Къурбанова, “Лезги газетдин” кьилин редактор Мегьа­мед Ибрагьимов, РД-дин Избиркомдин член Самир Абдулхаликьов, Кьурагь райондин Обществен­ный палатадин председатель Фахрудин Мирзоев, администрациядин са жерге векилар, мектебрин директорар ва масабур авай.

100 йисан девирда КIирийрин хуьруьн мектебди атIанвай баркаллу мензилрикай анин директор Фарман Шихкеримова гегьенш­диз доклад авуна. Адан гафарай малум хьайи­вал, сифте яз хуьре мектеб 1918-йисуз мис­кIиндин патав ачухна. Ана тар­сар араб чIалал тухузвай ва чирвилер анжах гадайривай къачуз жезвай. КIиривийри чпин сад лагьай муаллим хьайи Азербайжандай тир Темирханан тIвар садрани рикIелай алудзавач.

Мектебдин директорди къейд авурвал, рушар патал синиф хуьре сифте яз 1922-йи­суз ачухна. — XX асирдин эвел кьилера дагъвийрин уьмуьрда динди мягькем чка кьунвай, — лагьана Ф.Шихкеримова. — Дишегьлидин гзаф ихтиярар сергьятламиш хьанвайбур тир. Гьа жергедай яз, кIелунрин рекьяйни. Амма девирар къвез-къвез дегиш хьана. Дагъви рушаризни чирвилер къачудай, чпин алакьунар къалурдай, уьмуьрда чIехи ку­кIушар муьтIуьгъардай мумкинвилер кьисмет хьана…

Ф.Шихкеримова вичин докладда кIири­вий­рин савадлувал хкажуник лайихлу пай кутур муаллимар, жуьреба-жуьре йисара мек­тебдиз регьбервал гайи директорар рикIел хкана, хуьре юкьван мектеб арадал атай­далай кьулухъ къазанмишнавай агалкьу­нар къейдна, акьалтзавай несилриз хуьряй акъат­­навай машгьур векилрилай чешне къачуниз эвер гана.

Ахпа гаф Кьурагь райондин кьил Замир Азизоваз гана. Ада, мярекатдин иштиракчийрихъ элкъвена, Муаллимдин югъ ва мектебдин 100 йис тамам хьун мубаракна.

— 100-йис им тамам са девир я, — лагьана З.Азизова. — Саваддинни марифатдин макандиз элкъвенвай и мектебдай и девирда хуьруьн тIвар кьуд пата машгьур авур хейлин кьегьалар акъатнава. Абурун арада игитар, генералар, депутатар, хуьруьн майишатдин пешекарар, духтурар ва хейлин маса пешейрин сагьибар ава. Ихьтин дережаяр чеб-чпелай арадиз къвезвач. Абурун далудихъ пешекар муаллимри гзаф йисара чIугунвай дурумлу зегьметни диде-бубайри ганвай тербия гала. Акьалтзавай несилар гьахьтин ксарилай чешне къачуз алахъна кIанда. Вилик къаст эцигна, зегьмет чIугу. Ихьтин дуьшуьш­ра куь чалишмишвилери нетижани гуда, — алава хъувуна райондин кьили.

Иштиракчийрихъ элкъвена тебрикдин гафар Фируза Лагъметовади, Мегьа­мед Ибрагьимова, Самир Абдулхаликьова, Фахрудин Мирзоева, Кьурагь райондин администрация­дин образованидин управленидин начальник Рамазан Катибова, КIирий­рин хуьруьн администрациядин кьил Далгат Азизова, жуьреба-жуьре йисара мектеб акьалтIарай кIири­вийри, патарилай атанвай мугьманри лагьана. Чпин рахунра абуру жемиятда муаллимди­ ва мектебди къугъвазвай ролдикай, акьалт­завай несилри кьетIен фикир гана кIанза­вай терефрикай, чирвилер къачунихъ авай метлебдикай суьгьбетна.

Мярекатдин сергьятра аваз КIи­рийрин хуьруьн мектебда кIелзавай аялри шиирар кIелна, манияр лагьана, кьуьлерна. Эдебиятдин рекье сифтегьан камар къачузвай Амина Гьамзатовади мектебдикай кхьенвай вичин шиир кIелна.

100 йисан юбилейдиз талукьарнавай шадвилер спортдин залда суварин суфрайрихъ давам хъхьана. Кьавалрин “Бахтавар” дестеди (худ.руководитель — Рашид Келечиев) тамамарай манийри мярекат генани гурлу авуна.

Агьмед Магьмудов