Запорожьедин областдин Михайловский райондай Дагъустандиз гатун тIатIилрин вахтунда, ял ягъиз, 92 аял атанва. Абурухъ чпин 4 чIехидини гала. Мугьманар сагъламвал мягькемардай «Солнечный берег» лагерда ава.
Къейд ийин хьи, Запорожьедин областдин бязи районрал Дагъустан Республикади къаюмвалзава, абурун агьалийриз жуьреба-жуьре рекьерай куьмекар гузва.
Михайловский райондай атанвай аялар Дагъустанда 21 юкъуз амукьда. Абуруз дагъустанвийрин мугьманпересвал акунва. Вилик республикадин тIебиатдин гуьзел чкайрихъ, шегьеррихъ ва хуьрерихъ галаз танишардай еке программа ква.
Аялриз лагерда къулай шартIар тешкилнава. Вахт-вахтунда еридин менфятлу хуьрекар гузва, сагъламвал мягькемардай серенжемар кьиле тухузва. Аялри гьевесдивди спортдин, яратмишунрин, образованидин, культурадинни машгъулатрин серенжемра, акъажунра иштиракзава. Инанмиш я хьи, мугьманри секин гьалара ял яда, цIийи танишар жагъурда ва абур ватандиз хуш майилар аваз хъфида.
Чи мухбир
