Вад чкадиз…
2025-йисалай Махачкъаладин мукьув гвай вад поселок автобусдин алакъадалди таъминарда. Идакай «Дагъустандин экономика» телеграм-каналди хабар гузва.
Чешмеди кхьизвайвал, шегьердин мэрияди вилик гьялна кIанзавай месэла акъвазнавай поселокриз цIийи 44 автобус хиве кьазва.
ИкI, Махачкъала, винидихъ къейднавайвал, шегьердин мукьув гвай вад поселокдихъ галаз алакъалу жеда. Раижзавайвал, алай вахтунда а чкаяр умуми улакьар бес тежезвайбур я. Ингье абур:
ЦIийи Хушет (№ 101-р);
Шамхал (№ 105-р);
Шамхал-Термен (№ 106-р);
Сулак (№108-р);
Загородный (№ 188-р).
Чешмедин къейдерай малум жезвайвал, чпикай ихтилат физвай автобусар еке классдинбур я. Абур республикадив алай йисан эхирдалди агакьарда.
Хабар гузвайвал, цIийи улакьрин кIвалах 2025-йисан 1-январдилай кардик акатда.
ТIимил хьанва
Дагъустанда эхиримжи йисара цицIери кьунвай майданрин кьадар тIимил хьанва. ИкI, «Дагъустан» РИА-ди, РД-дин Россельхозцентрадин делилрал асаслу яз, хабар гузвайвал, эгер 2022-йисуз цицIериз акси серенжемар тухуналди гьялнавай чилерин кьадар 74 агъзур гектар тиртIа, цIи и рекъем 29 агъзур гектардилай са тIимил алатнава.
Хабар гузвайвал, ихьтин нетижа ведомствойри сада-садахъ галаз алакъада аваз кIвалахун ва Оперативный штабдин (адан къурулушдик РД-дин хуьруьн майишатдин министерстводин, районрин хуьруьн майишатдин управленийрин ва муниципалитетрин администрацийрин векилар акатзава) серенжемар себеб хьана арадал атанвайди я.
Чешмеди раижзавай делилрай малум жезвайвал, чилер гьялуниз талукь кар алай кIвалахар региондин кеферпата кьиле тухвана — Ногъай, Тарумовка, Къизляр районра, гьакIни куьчарнавай гьайванар хуьдай Кочубейдин зонада.
Раижзавай делилрай малум жезвайвал, алай вахтунда Россельхозцентрадин пешекарри чуьллера цицIери «какаяр ханвай чкаяр» (кубышки) аватIа чирун патал гьар йисуз ийизвай зулун ахтармишунар кьиле тухузва. Къейдзавайвал, и серенжем алукьдай йисуз цицIер чукIунин мумкинвал гьихьтинди ятIа виликамаз чириз алахъун патал ийизва.
ГьакIни чешмеди хабар гузвайвал, алай йисуз пешекарри цицIериз акси яз чилер гьялунин кIвалахар гьам чилел, гьамни авиация желб авуналди кьиле тухвана.
Артух жезва
Дагъустанда алай йисан 8 вацра 28 агъзурдалай гзаф аялар ханва. Идакай, махсус чешмедал асаслу яз, РД-дин Гьукуматдин телеграм-каналди хабар гузва.
Кьилди къачуртIа, чешмеди, республикадин здравоохраненидин министрдин везифаяр вахтуналди тамамарзавайди тир Ярослав Глазован гафарал асаслу яз, кхьизвайвал, Дагъустанда чпин яшар 17 йисал кьван тир аялрин кьадар 2014-йисалай инихъ 737 агъзурни 406-далай 901 агъзурни 047-дал кьван артух хьанва. Къейдзавайвал, ихьтин яшда авайбурун кьадарди региондин вири агьалийрин умуми кьадардикай 28,1 процент тешкилзава.
Ярослав Глазован къейдерай малум жезвайвал, республикада аялар хьунин рекъем виниз акъатзавайди виле акьазва. Кьилди къачуртIа, 2024-йисуз хьанвай аялрин кьадар 1135 чагъадин гзаф хьанва. ИкI, Росстатдин делилралди, алай йисан 8 вацра 28 381 чагъа дидедиз хьанва.
Гьазурайди – Муса Агьмедов
