3-декабрдиз РД-дин Кьил Сергей Меликова республикадин кар алай мес­элайриз талукьарнавай совещание кьиле тухвана. Адан сергьятра аваз, веревирд авур бязи месэлайрикай агъадихъ куьрелди хабар гузва.

РД-дин Кьилин ва Гьукуматдин Администрациядин руководитель Махач Омарован гафаралди, алай йисан ноябрдин вацра республикадин гьукумдин органриз, идарайриз агьалийрин патай, санлай къачурла, саки 6 агъзур арза агакьна. Ихьтин рекъем ЦУР-ди раижнава. Гьа са вахтунда 15 муниципалитетда мукьвал-мукьвал эквер хкатунихъ галаз алакъалу яз ийизвай арзайрин кьадар тIимил хьанва. Ихьтин гьал вахт-вахтунда зирзибил тухун тавунихъ галаз алакъалу арзайрин кьадардизни талукь я.

Алай вахтунда Дагъустанда 1400-далай виниз мектебар ава ва анра саки 500 агъзурдав агакьна аялри кIелзава. Абурукай 1-4-классра кIел­завай 214 агъзур аялдиз бюджетдин такьатрихъ гьавая тIуьн гузва. Сергей Меликова мектебра аялриз гузвай чими хуьрекрин ери хъсанарунин жигьетдай буйругъар гана.

Совещанидал региондин Кьили Тля­ра­та райондин администрациядин кьилин кIвалахдилай вичин наразивал къа­лурна­. Кьилди къачуртIа, муниципалитетдин кьи­ле­вайбуру чкадин агьалийрин арзайра­ къарагъарзавай мес­элаяр гьялзавач, яша­йишдин рекьяй кардик квай проектар лап зайиф еришралди кьилиз акъуд­зава…

РД-дин тIебиатдин ресурсрин ва экологиядин министр Ратмир Расулова­ вичин докладда муниципалитетра зирзибил гадардай контейнерар, абур эцигдай­ махсус майданар кардик кутун­, туькIуь­рун патал кьиле тухузвай кIва­лах­ри­кай ихтилатна. Адан гафаралди, респуб­ли­када контейнерар эцигдай махсус майданар авачир районарни ава. Абур кардик кутун патал бязи районри гьукуматдин программайра иштиракзава ва бюджетдин такьатрихъ и месэла гьялзава.

ГьакIни совещанидал Сергей Меликова мукьвара кьиле фейи ачух эфирда къарагъарай са шумуд месэладин гьакъиндай талукь идарайриз тапшуругъар гана.

Гегьеншдиз РД-дин Кьилин сайтдай кIелиз жеда.

Агьмед  Магьмудов