Авайвал тунва

РД-дин энергетикадин ва тарифрин министерстводи Махачкъаладин ва Каспийскдин арада кIвалахзавай юкьван ва чIехи классрин автобусрин, гьакIни троллейбусрин рекьин гьакъидиз талукь кьадарар тестикьарнава. Идакай Каспийск шегьердин администрациядин телеграм-каналди хабар гузва.

Чешмедин къейдерай малум жезвайвал, винидихъ чпикай ихтилат физвай улакьрин рекьин гьакъидин къиметар дегиш хьанвач, гьа вилик авай жуьреда тунва.

ИкI, рекьин гьакъидин кьадарар ихьтинбур я:

 чIехи классдин 100-нумрадин автобусдин (Метан) рекьин гьакъидин къимет — 30 манат;

 юкьван классдин 100-А-нумрадин автобусдин (Метан) рекьин гьакъидин къимет — 40 манат;

 троллейбусрин рекьин гьакъидин къимет — 20 манат.

ЦIийикIа туьхкIуьрун

Дагъустанда федеральный дережадин шегьре рекьер цIийикIа туьхкIуьрун патал Росавтодорди 13,6 миллиард манат харжда. Идакай «Дагъустан» РИА-дин телеграм-каналди хабар гузва.

Кьилди къачуртIа, чешмеди къейдзавайвал, респуб­ли­када 2028-йисалди федеральный «Кавказ» шегьре­ ре­­кьин, санлай къачурла, саки 75 километрдикай ибарат паяр (отрезки) цIийи кьилелай, гьакIни цIийи жуьреда туьхкIуьрун пландик кутунва.

Росавтодорди къейдзавайвал, виликамаз кьунвай делилралди, и серенжемар кьилиз акъудунин къимет, винидихъ къейднавайвал, 13,6 миллиард манатдикай ибарат жеда.

Хабар гузвайвал, Дагъустанда шегьре рехъ туьхкIуь­рунин ва цIийи хъувунин серенжемар 2022-йисалай кьилиз акъудзава.

Важиблу месэла

И йикъара РД-дин энергетикадин ва тарифрин министр Марат Шихалиева Дербент шегьердин администрацияда кьиле тухвай совещанидал «Дербент — Северная-2» 110 кВт-дин подстанция эцигна акьалтIаруниз талукь месэла веревирдна. Идакай «Дагъустан» РИА-ди хабар гузва.

И серенжемда шегьердин мэрди, «Россети Северный Кавказ» ПАО-дин, «Дагэнерго» филиалдин векилрини иштиракна.

Совещанидал Марат Шихалиева къейд авурвал, «Дербент — Северная-2» подстанция эцигуниз талукь мярекатар «Дербентдин мулкар комплекснидаказ вилик тухун» («Комплексное территориальное развитие Дербен­та») гьукуматдин программадик кутунва. Объект вич ла­гьайтIа, 2 дережада (этапда) хкажун пландик кутунвай. Адан сад лагьай дережа республикадин бюджетдин такьатрин гьисабдай акьалтIарнава. Амма пулдин такьатар чара ийидай чешме авачирвиляй кьвед лагьай дережа кьилиз акъудунин кардик гьеле кьил кутаз хьанвач.

Хабар гузвайвал, гьа са вахтунда мярекатдал и объект шегьер патал важиблу метлеб авайди тирдини къейдна.

Пешекаррин гафаралди, алай вахтунда сихдаказ яша­йишдин эцигунар авай мулкунал кардик квай «Дербент — Северная» подстанциядин гужлувал бес жезвач. Адалди яшайишдин метлеб авай объектар электроэнергиядалди таъминарзава. И делил себеб яз  электроэнергия ара атIунар авачиз гун патал аслу тушир игьтиятдин чешме хьунин важиблувал арадал къвезва. Эцигзавай подстанция гьа и кар патални ишлемишун фикирда кьунва.

Пуд сеферда хкаж хьанва

Дагъустанда алай йисан эвел кьилелай инихъ балугъар гьялунин кьадар пуд сеферда артух хьанва. Идакай РД-дин балугърин майишатдин Комитетдин пресс-къуллугъди хабар гузва.

ИкI, чешмеди къейдзавайвал, 2024-йисан сад лагьай паюна недай суьрсетдин карханайри 600 тонндив агакьна балугъар гьялнава. Хабар гузвайвал, 2023-йисан и муддатда и рекъем 3 сеферда тIимил тир.

Гьазурайди — Муса  Агьмедов