Дагъустанда алай йисан сад лагьай паюна газ тухванвай кIвалерин кьадар 7,5 агъзурдалай алатнава. Алатай йисан и девирдив гекъигайтIа, и рекъем саки 14 процентдин гзаф хьанва. Идакай «Газпром межрегионгаз Махачкала» ООО-дин генеральный директор Ризван Мурадова ТАСС-диз хабар гана.
Адан гафаралди, винидихъ къейднавай рекъем хкаж хьун сифте нубатда, цIийиз эцигна, ишлемишиз вахканвай кIвалерин кьадар артух хьунихъ галаз алакъалу я.
«Эхиримжи вахтара яшайишдин кIвалериз талукь документар къайдадик кутунвай агьалийрин патай газ тухун патал къвезвай арзайрин кьадар, гьакъикъатдани, гзаф жезва. Алава хъийин, кIвализ газ тухун патал чи идарадин къуллугърикай менфят къачуз кIанзавайбурувай МФЦ-дизни арзаяр вугуз жеда», — лагьана Р. Мурадова.
«Лезги газет»
