Тумар гьасилда

Дагъустанда тумчивилин (семеноводство) кье­­тIен чка арадал гъунин месэла алай вахтунда ­федеральный дережада аваз веревирдзава. Идакай РД-дин хуьруьн майишатдин ва недай суьрсетдин министерстводин телеграм-каналди хабар гузва.

Чешмеди, ВИР-дин (Всероссийский институт генетических ресурсов растений имени Н.И. Вавилова) филиал тир Дагъус­тандин тежрибадин станциядин директор Киштили Куркиеван гафарал асаслу яз, къейдзавайвал, тумчивилин кIвалахар тухун патал Дагъустанда хьтин шартIар авай мулкар вири дуьньяда авайди анжах са шумуд я.

Адан гафаралди, ДОС-ВИР-ди РД-дин федеральный аграрный илимдин центрадихъ галаз санал гьар йисуз 1,5 агъзур тонндилай виниз техилдин ва хуьруьн майишатдин магьсулрин хъсан еридин тумар, 10 тонндив агакьна салан майвайрин тумар гьасилзава, 100 агъзурдав агакьна емишрин къелемарни арадал гъизва.

РД-дин хуьруьн майишатдин ва недай суьрсетдин министр Мухтарбий Аджекова къейдза­вайвал, Дагъустанда тумчивал йигиндаказ­ вилик фин давам жезва. ИкI, республикада ­жуь­реба-жуьре магьсулрин хейлин тумар арадал гъанва.

Чиновникдин гафаралди, ДОС-ВИР-ди ва РД-дин федеральный аграрный илимдин центради чара авур грантдин куьмекдалди, 2023-йисуз 9,2 тонн салан майвайрин, 1,6 агъзур тонндилай гзаф кьетIен шартIарин чкайра цадай зулун магьсулрин тумар арадал гъана.

10 млн манат чара авунва

Дагъустанди некIедин малдарвал (молочное ­животноводство) вилик тухун патал­ 10 миллион манат чара авунва. Идакай, РД-дин хуьруьн майишатдин ва недай суьрсетдин министр  Мухтарбий Аджекован гафарал асаслу яз, ведомстводин телеграм-каналди хабар гузва.

Чиновникдин гафарай малум хьайивал, рес­пуб­ликада калерин жинс хъсанарунин кIвалах кьиле ­тухузва, и серенжем гьа са вахтунда махсус прог­раммадин сергьятра авазни уьмуьрдиз кечирмишзава.

ИкI, и макьсадар патал республикадин бюджетдай РД-дин федеральный аграрный илимдин центрадиз, винидихъ къейднавайвал, 10 миллион манат чара авунва.

Чешмеди кхьизвайвал, республикада­ гьакIни некIедин гьайванар хуьнин хиле еке инвестпроектар кьилиз акъудунин кардикни кьил кутунва. И серенжемрин сергьятра аваз, цIийи жуьредин (инновационный) фермаяр арадал гъида.

Виниз тир еришралди

Дагъустанда яшайишдин кIвалер вахкунин ериш 2024-йисан эвел кьилелай уьлкведа виридалайни винизди я. Идакай, Росстатдал асаслу яз, «Дагъус­тан» РИА-ди хабар гузва.

ИкI, алай йисан сифтегьан 2 вацра­ республикада вахканвай яшайишдин кIвале­рин майданрин кьадар 4,5 сеферда артух хьанва. Чешмеди къейдзавайвал, и рекъем, алатай йисан и муддатдив гекъигайла, хейлин гзаф я.

Хабар гузвайвал, эгер 2023-йисан ян­варь-фев­­раль варцара республикада 131 агъзур кв.метрдин яша­йишдин кIвалер вах­кан­вайтIа, 2024-йисуз и ре­къем 731 агъзур кв.метрдиз барабар я.

Росстатдин делилралди, яшайишдин кIва­лер вахкунал гьалтайла, кIвенкIвечи чка­дал алай 10 региондик Дагъустан, Татарстан, Москвадин ва Ленинграддин областар, Краснодардин край ва масабур акатзава.

Сифте жергейра ама

РД-дин хуьруьн майишатдин ва недай суьрсетдин министерстводин телеграм-каналди хабар­я гузвайвал, къене цил авай культураяр гьасилун патал чара авунвай майданрин кьадардал гьал­тайла, Дагъус­тан Республика уьлкведа кIвенкIве­чи регионрин сиягьда ама. Ихьтин багълар регионда 11 агъзур гектардилай виниз мулкара экIя хьанва. Респуб­ликада гьар йисуз саки 11 агъзур тонндив агакьна пIинияр ва шурван пIинияр кIватI хъийизва.

Гьазурайди — Муса Агьмедов