КIвалералди ­таъминарнава

Дагъустанда 2020-2023-йисара 1176 етим аял яшайишдин кIвалералди таъминарнава. Идакай РД-дин Гьукуматдин телеграм-каналди хабар гузва.

Республикадин премьер-министр Аб­дулмус­лим Абдулмуслимован гафаралди, кьилди къа­чур­тIа, 2023-йисуз, яшайишдин кIвалин сертификатдин такьатар ишлемишуналди, кIвалер маса къачудай ихтиярар 189 арзачидиз гана. И макьсадриз 440 миллион манат пул акъатна.

РД-дин Гьукуматдин Председателди гьакIни къейдзавайвал, Дагъустанда 2024-йисуз саки 300 етим аял яшайишдин кIвалералди таъминарун пландик кутунва.

Чешмеди кхьизвайвал, кьилди къа­чуртIа, алай йисуз етим ва диде-бу­байрин къаюмвал авачиз амукьнавай аялар яшайишдин кIвалералди таъминарун патал республикадин бюджетда саки 800 миллион манат фикирда ­кьунва.

Къимет гана

НМИЦ РК-дин (РФ-дин здравоохра­ненидин министерстводин реабилита­циядин ва курортологиядин милли ме­ди­­цинадин ахтармишунардай центр) медицинадин куьмек тешкилдай отделенидин начальник Геннадий Терешина­ Да­гъустанда медицинадин реабилитациядин вири дережаяр кардик квайдакай къейдна. Ихьтин фикир пешекарди­, кIвалахдин сергьятра аваз, рес­пуб­лика­диз мугьман хьайила, раижна. Идакай­ РД-дин здравоохраненидин минис­тер­ст­водин те­леграм-каналди хабар гуз­ва.

Кьилди къачуртIа, адан гафаралди, жуьреба-жуьре хасаратвилер хьанвай агьалийрин сагъламвал арадал хкун патал Дагъустанда цIийи мумкинвилер пайда хьанва. Ина реабилитациядин вири пуд дережани ава: сад лагьайди — реанимациядин, кьвед лагьайди — стационардин, пуд лагьайдини — амбулаториядин.

Чешмеди гьакIни кхьизвайвал, республикада, «Оптимальная для восста­новления здоровья медицинская реа­билитация в Республике Дагес­тан» прог­раммадин сергьятра аваз, эхиримжи кьве йисан къене медицинадин тешкилатрив 500 уьлчмедилай виниз алай девирдин истемишунрив кьадай жуьредин реабилитациядин тадаракар агакьнава.

РД-дин здравоохраненидин министерстводин теле­грам­-ка­­нал­ди гъизвай делилралди­, кьилди къачуртIа, Да­гъустанда 2022-2023-йисара РБВЛ, РЦР, Рес­пуб­лика­дин тади гьалда медицинадин куьмек ага­кьардай клинический духтурхана (РКБСМП), 2-нумрадин РБК, Дербент шегьердин кьилин дух­турхана ва маса идараяр тадаракламиш­нава.

Идалайни алава яз, чешмеди къейд­завайвал, 2024-йисуз медицинадин 6 тешкилат тадаракламишда. Хабар гузвайвал, и программа 2030-йисалди кардик ква.

Агъуз аватнава

Алай йисан эвел кьилелай инихъ Урусатдиз Туьркиядай ва Азербайжандай, санлай къачурла, 27,5 миллиондилай виниз вечрен какаяр гъанва. Идакай РД-дин хуьруьн майишатдин ва недай суьрсетдин министерстводин телеграм-каналди хабар гузва.

Чешмедин делилралди, кьилди къа­чуртIа, январдин вацра Дагъустанда вечрен какайрин къимет 5,8 процент­дин агъуз аватнава. ИкI, 10 какадикай ибарат лоток юкьван гьисабдалди 135 манатдай маса къачуз жезва.

Къейдзавайвал, гьа са вахтунда регионда и рекьяй инвестициядин са жерге проектарни ­уьмуьрдиз кечирмишзава. Чешмеди кхьизвайвал, абурун куьмекдалди республикада гьасилзавай вечрен какайрин кьадар саки кьве сеферда артух жеда — йисан къене 500 миллиондал кьван.

РикIел хкин, виликдай чна хабар гайивал, рес­публикада гьар йисуз тахминан 250 миллион кака гьасилзава. РД-дин хуьруьн майишатдин ва недай суьрсетдин министерстводин делилралди, регионди вичин игьтияжар анжах 30 процентдин кьадарда таъминарзава.

Санлай къачурла, республикадин игьтияж­ 800 миллиондиз барабар я. Бес тежезвай ка­ка­яр­ Дагъустандиз уьлкведин са жерге регионрай — Сверд­ловскдин, Волгограддин областрай ва Став­рополдин крайдай гъизва.

Къейдзавайвал, 2024-йисан 30-июн­­далди къе­цепатан уьлквейрай Уру­сат­диз 1,2 миллиард кака гъун лазим я.

Гьазурайди — Муса  Агьмедов