12-мартдиз Махачкъалада РД-дин хуьруьн майишатдин ва недай суьрсетдин министерстводин коллегиядин заседание кьиле фена. Адан кIвалахда РД-дин Гьукуматдин Председатель Абдулмуслим Абдулмуслимовани иштиракна.
Мярекатдал малум хьайивал, хуьруьн туризм Дагъустанда пулдин куьмек гудай асул хилерикай сад я. ЦIи и хилез республикадин бюджетдай 15 миллион манатдив агакьна пул чара ийида.
Хуьруьн мулкар яшайишдинни экономикадин жигьетдай вилик тухун патал республикада махсус къанун кьабулнава ва адан бинедаллаз государстводин патай пулдин куьмек гудай хилерик хуьруьн туризмни кутунва. Къейд ийин хьи, А.Абдулмуслимова гайи и теклифдин тереф РД-дин Халкьдин Собранидин депутатрини хвена.
Кьилди къачуртIа, региондин парламентдин депутат Асият Алиевадин фикирдалди, хуьруьн туризм вилик фини АПК-дин хилени хъсан патахъ дегишвилер кьиле финиз таъсирда. Месела, кIвалахдай цIийи чкаяр арадал къведа, бюджетдиз къвезвай налогрин кьадарни артух жеда.
«Лезги газет»
