Куьмек гун давамарда
Дагъустандин куьнуьчийри 2023-йисуз 1 агъзур тонндилай виниз вирт гьасилна. Идакай РД-дин хуьруьн майишатдин ва недай суьрсетдин министерстводин телеграм-каналди хабар гузва.
Министр Мухтарбий Аджекован гафаралди, куьнуьчивилин хиле республикадин АПК-да лайихлу чка кьун лазим я. Гьавиляй ам вилик тухун патал гьукумдин кьилевайбуру герек тир серенжемарни кьабулзава.
Ада къейд авурвал, Дагъустанда саки 5 агъзур кас куьнуьчивилел машгъул я. Абуру, санлай къачурла, алатай йисуз, винидихъ къейднавайвал, 1 агъзур тонн вирт гьасилна. Адан гафаралди, и рекье кьиле тухузвай кIвалах генани гужлу авун лазим я.
Министрдин рахунрай малум хьайивал, шаз, 30 йисан къене сифте яз, и хел вилик тухун патал 10 миллион манат чара авунай. Алай йисузни бюджетдик пулдин гьа икьван такьатар кутунва. Чиновникдин гафаралди, и серенжем 2025-2026-йисарани давамарда.
Чешмеди, Дагъустандин чIижерхъанрин ассоциациядин председатель Надир Агьмедован гафарал асаслу яз, хабар гузвайвал, и тешкилатди Саудрин Аравиядиз ва Арабрин Сад хьанвай Эмиратриз вирт ракъурун патал махсус икьрар кутIуннава. Ада рикIел хкайвал, республикада и ассоциация куьнуьчивилиз талукь месэлаяр гьялун ва и хел цIийи дережадиз акъудун патал РД-дин хуьруьн майишатдин министерстводин теклифдалди арадал гъайиди я.
Тешкилатдин председателдин гафаралди, куьнуьчияр чпин кIвалахда расалмиш жезвай кьилин месэлайрин арада чIижерин уьзуьрарни ава. И татугай гьалдихъ галаз женг тухун патал республикадиз чпихъ и рекьяй девлетлу тежриба авай Белоруссиядин пешекарриз теклифнава.
Идалайни алава яз, Надир Агьмедова Дагъустанда чIижерин уьзуьрар ахтармишдай ва виртIедин ери тайинардай лабораторияр тешкилунин, вирт цадай ва ам къапара твадай шагьадатнама гвай цехар эцигунин, куьнуьчивилин хилехъ галаз алакъалу маса серенжемар кьилиз акъудунин игьтияж авайдини къейдна.
Нетижаяр раижна
Алатай йисуз Дагъустандин хуьруьн майишатдин вилик эцигнавай макьсадар 105,8 процентдин кьилиз акъуднава. Идакай, махсус чешмедал асаслу яз, РД-дин хуьруьн майишатдин министерстводин телеграм-каналди хабар гузва.
Чешмеди гьакIни, РД-дин Гьукуматдин Председатель Абдулмуслим Абдулмуслимован гафарал асаслу яз, къейдзавайвал, Дагъустанда 2023-йисуз хуьруьн майишатдин продукциядин кьадар, пулдин такьатралди гьисаба кьуртIа, санлай къачурла, 212,3 миллиард манатдив агакьна.
Чиновникдин гафарай генани малум хьайивал, шаз Дагъустанда 1,3 миллиондилай виниз майвайрин ва маса къелемар арадал гъанва. Ада къейдзавайвал, и кар себеб яз республикадиз патай гъизвай къелемрин кьадар алатай йисуз 1,7 сеферда тIимил хьана. ИкI, 2022-йисуз и рекъем 1 миллион уьлчмедиз барабар тиртIа, 2023-йисуз адан кьадар 297 агъзурдал кьван аватна.
Дагъустанда сифте яз
Нижний Новгороддин областдай тир инвесторди Мегьарамдхуьруьн районда голубикаяр (куьлуь вили емишар) гьасилунин кардик кьил кутунва.
Къейдзавайвал, Ярагъ-Къазмайрин майишатрикай сана и жуьредин куьлуь емишар патал 1 гектар чил чара авунва. Алай йисан зулухъай абур цадай майданрин кьадар 5 гектардив агакьарун пландик кутунва.
РД-дин хуьруьн майишатдин ва недай суьрсетдин министерстводин пресс-къуллугъди хабар гузвайвал, гьар са кулунилай 5 килограмм бегьер кIватI хъувун вилив хуьзва.
«Дагъустандин экономика» телеграм-каналдин малуматралди, и жуьредин емишрин багъ Дагъустанда сифте яз пайда жеда.
РД-дин хуьруьн майишатдин ва недай суьрсетдин министерстводин делилралди, Дагъустанда 2023-йисуз 7,5 агъзур тонндилай гзаф куьлуь емишрин бегьер кIватI хъувунва. Им Кеферпатан Кавказдин федеральный округда гьасилнавай умуми гьисабдикай саки 40 процент я.
Гьазурайди — Муса Агьмедов
