Кьуд сеферда артух

Эхиримжи вад йисан къене Дагъус­танда гьялзавай чил минеральный за­тIаралди миянарун саки кьуд сеферда артух хьанва. Идакай РД-дин хуьруьн майишатдин ва недай суьрсетдин минис­терстводин пресс-къуллугъди ха­бар гузва.

Эгер 2018-йисуз республикадин аграрийри гектардик анжах 10 килограмм минеральный миянардай затIар кутазвайтIа, 2023-йисуз и рекъем 38 килограммдал кьван хкаж хьана.

Санлай къачурла, шаз хуьруьн майишатдал машгъул ксари саки 14,5 агъзур тонн минеральный миянардай затIар маса къачуна. Къейдзавайвал, им сифтедай пландик кутунвайдалай артухан рекъем я.

Миянардай минеральный затIари­кай менфят къачуни магьсулрин гьам бегьер артух, гьамни абурун ери хъсан хьуниз таъсирзава, — къейдзава винидихъ тIвар кьунвай министерстводин пресс-къуллугъди.

2-чкадал ала

Интернетдин куьмекдалди тешкилзавай алиш­­веришдин компанийрин ассоциациядин (АКИТ)  делилралди, 2023-йисан январь-ноябрь варцара ­Да­гъустанда интернетдин куьмекдалди кьиле тухвай алишверишдин кьадар 24,88 милли­ард ма­натдиз барабар хьанва. 2022-йисан гьа и муд­датдив гекъигайла им, 10,6 процентдин гзаф я. Идакай РД-дин промышленностдинни алишверишдин министерстводин пресс-къуллугъди хабар гузва.

Чешмеди къейдзавайвал, и жигьет­дай СКФО-дин регионрин арада Да­гъус­танди 2-чка кьазва, 1-чкадал ла­гьайтIа, Ставрополдин край ала.

Интернетдин майданрай маса къачузвай машгьур метягьрин арада агъадихъ галайбур ава: парталар, кIвачин къапар, мебель, кIвале ишлемишдай, аялрин затIар ва масабур.

Чешмедин делилралди, 2023-йисуз сейли мар­кетплейсрин жергеда «Ozon.ru», «Wildberries», «Lamoda», «ВсеИнструменты.ру» ва мсб. гьатнава. Алай вахтунда Дагъустанда маркетплейсрин 400-лай виниз пунктар кардик ква.

Артух такьатар харжда

Дагъустанди 2024-йисуз республикадин бюджетдай цицIерихъ галаз женг тухуниз 15 миллион манат чара ийида. Идакай РД-дин хуьруьн майишатдин ва недай суьрсетдин министерстводин пресс-къуллугъди хабар гузва.

Идарадин делилралди, 2023-йисав гекъигайла, и рекъем пуд сеферда гзаф я. Санлай къачурла, саки 53 агъзур гектар чилел зиянкарриз акси серенжемар кьиле тухун пландик кутунва. 2022-йисуз лагьайтIа, ихьтин кIвалахар хуьруьн майишатдин макьсадра  ишлемишзавай саки 18,8 агъзур гектар чилерал кьиле тухванай.

Министерстводин пресс-къуллугъди алава хъу­вурвал, республикада цицIериз акси серенжемар кьиле тухуниз талукь оперштаб кардик кутада. Ана муниципальный образованийрин, Россельхозцентрадин, МЧС-дин векилри иштиракда.

Тежрибадикай менфят къачуда

Ингушетияди дарманрин набататар гьялунин ва хъчадин чаяр арадал гъунин карда Дагъустандихъ авай тежрибадикай менфят къачуда. Идакай «Интерфакс» изданиди хабар гузва.

Ингушетиядин тIебиатдин ми­нистр Саварбег Холохоев­ан гафаралди, ихтилат физвай месэладин гьакъиндай Дагъустандихъ галаз алакъалу хьанва ва алай вахтунда и жигьетдай кIвалах виликди физва. Ада гьакIни къейд авурвал, Дагъус­тандихъ и рекьяй авай тежриба Ингушетиядани кардик кутада ва и серенжемдал дагъустанви пешекарар желбда.

Ингушетиядин кьил Магьмуд-Али Калиматован гафаралди, и проект кьи­лиз акъудунин асул макьсадрикай­ сад карханаяр эцигун, кIвалахдай алава­ чкаяр арадал гъун ва хуьрерин агьалийрин арада бейкаррин кьадар тIимиларун я.

Гьазурайди — Муса  Агьмедов