Дагъустанда алай йисуз государcтводин патай кьезилвилер авай агьалияр дарманралди таъминаруниз 2 миллиард манатдилай виниз пулдин такьатар чара авунва. Идакай 12-февралдиз Махачкъалада кьиле фейи совещанидал РД-дин Гьукуматдин Председатель Абдулмуслим Абдулмуслимова хабар гана.
Адан гафаралди, эхиримжи йисара республикадин бюджетдай и макьсадриз ахъайзавай такьатрин кьадар са шумуд сеферда гзаф хьанва.
Гьа са вахтунда премьер-министрди къейд авурвал, пулдин такьатрин кьадар артухарнаватIани, дарманралди таъминарунин жигьетдай агьалийрилай арзаяр атун давам жезва.
А.Абдулмуслимова хабар гайивал, кьиле тухванвай ахтармишунри къалурзавайвал, республикадин здравоохраненидин идарайри (духтурханайри) бязи дарманар багьа къиметрай маса къачузва. Асул гьисабдай и кар дарманар маса гузвай карханайрихъ галаз икьрарар кутIундайла, арадал къвезвай месэлайрихъ галаз алакъалу я.
РД-дин Гьукуматдин Председателди талукь идарайриз и кардин гьакъиндай кьилдин ахтармишунар тешкилун буйругъна.
Агьмед Магьмудов
