Сергей Меликова Дагъустандин Кьил яз пуд йисан къене кьиле тухвай кIвалахрин нетижаяр инанмишвилелди разивализ жедайбур я лугьуз жеда. Жуьреба-жуьре имтигьанарни экономикадихъ галаз алакъалу четинвилер гьалтзавай и девирда Дагъларин уьлкве дурумлудаказ виликди физвай регионрикай сад яз амукьзава.
Зун пешекар эксперт туш, гьавиляй экономикадиз талукь месэлайрин деринризни зун эвичIдач. Амма и кар галачизни чун вири патал якъин я: эхиримжи йисара Дагъустандиз къвезвай инвестицийрин кьадар садлагьана артух хьанва. Са шакни алачиз, им региондин Кьили чIехи инвесторрихъ галаз кьиле тухузвай кIвалахдин, абуруз гузвай заминвилерин, тешкилзавай шартIарин нетижа я.
Сергей Меликоваз хас виридалайни кьетIен ерийрикай сад – ам гьар са месэладив рикI гваз, инсанвилелди эгечIун я, адаз вичин иштираквал аваз гьар са кардай кьил акъудиз кIанзава. Пуд йисан къене ам Дагъустандин саки гьар са пипIез мугьман хьана, гьатта виридалайни дагълух районарни кваз.
Мадни са кар: региондин Кьили Украинада кьиле физвай махсус серенжемда телеф хьайи, исятдани чешнелудаказ къуллугъ давамарзавай аскеррин диде-бубайрихъ галаз мукьвал-мукьвал гуьруьшар кьиле тухузва, абурун хизанрин гьакъиндай къайгъударвал чIугвазва. И месэладикай рахадайла Сергей Меликова кьилел еке бедбахтвал атай Гьасангьуьсейноврин хизандиз гайи фикирни рикIел хквезва.
Сергей Меликов Дагъустандиз регьбервал гуз эгечIай вахт регьятди тушир: чкадин инфраструктура (энергетикадин, рекьерин, коммунальный ва мсб.) михьиз пайгардикай хкатнавай лагьайтIа жеда. Месэлаяр «гамунин кIаник» чуьнуьхдай мумкинвал авачир, ам абур гьялунив эгечIна. Амма абурун дувулар акьван деринриз фенва хьи, пулдин чIехи такьатар ва гьакьван вахтни галачиз абур гьялна акьалтIариз жедач. Гьайиф хьи, Дагъустандин Кьиливай и кар истемишзавай бязи лагълагъчияр и кардин гъавурда акьазвач, я акьаз кIанзавач.
Сергей Меликова зирзибил гьялунин, цIийи рекьер эцигунин, цIийикIа туькIуьр хъувунин жигьетдай гъиле кьунвай проектар тайинарнавай вахтунда кьилиз акъатдайдак ва дагъустанвийрин яшайишдин шартIар мадни къулай жедайдак за умудар кутазва.
Республикада авай кар алай месэлайрикай сад энергетикадин хилехъ галаз алакъалу я. Чир хьана кIанда, и хиле кIвалахзавай «Россети» тешкилат региондин гьукумдиз муьтIуьгъ жезвач. Гьавиляй Сергей Меликова ихтилат физвай месэла федеральный дережадин гьукумдин вилик эцигзава, ам гьялдай рекьер жагъурзава, къуватар желбзава. Амма вири садлагьана гьялиз тежедайди кьатIана кIанда.
Дербент шегьердикайни кьве гаф лугьун. Сергей Меликов федеральный дережадин гьукумди къадим шегьердихъ галаз хуьзвай алакъаяр мадни мягькемариз алахъзава, сенатор Сулейман Керимовахъ галаз авай рафтарвилер мягькемарзава. И рекье адаз Федерациядин Советда, СКФО-да Президентдин Векил яз кIвалахай йисара хьанвай тежрибади, шаксуз, куьмекзава.
Мукьвара «Урусатдин тарихдинни медениятдин ирс» лишандик кваз Дербентда кьиле фейи парламентдин форумди винидихъ за лагьай гафар нубатдин сеферда тестикьарзава. РикIел хкин, лишанлу и мярекатда Федерациядин Советдин Председатель Валентина Матвиенкоди, РФ-дин Президентдин Администрациядин Руководителдин заместитель Мегьамедсалам Мегьамедова, ФАДН-дин руководитель Игорь Баринова ва масабуру иштиракнай.
Республикада авай гьаларин са тIимил кьванни гъавурда авай гьар са касдиз якъин я: Дагъустандин Кьил вичин тIвар машгьур авунал машгъул туш, адан къаст Дагъларин уьлкведа экономика вилик тухун, дагъвийрин яшайишдин шартIар хъсанарун я. Къе Сергей Меликова гъиле кьунвай проектри идалай кьулухъ цIуд йисаралди дагъустанвийрин яшайишдин къулайвал таъминарда.
Васиф Гьасанов,
ФЛНКА-дин президент
