ЦIийи улакьар гана
Дагъустанди чкадин здравоохраненидин идараяр патал санитарный транспортдин 42 уьлчме маса къачуна. Идакай РД-дин Гьукуматдин телеграм-каналди хабар гузва.
Чешмеди къейдзавайвал, цIийи улакьар республикадин медицинадин идарайриз пайнава, Абурукай са кьадарбур республикадин дагълух хуьрериз рекье тунва.
ЦIийи улакьар начагъ агьалияр, духтурар санай масаниз тухун, анализар ва биоматериалар, дарманар герек тир чкайрив агакьарун ва духтурханайрин, поликлиникайрин маса игьтияжризни талукь серенжемар кьилиз акъудун патал ишлемишда.
РД-дин премьер-министр Абдулмуслим Абдулмуслимова хабар гайивал, цIийи машинар «Здравоохранение» милли проектдин сергьятра аваз къачунва. Адан гафаралди, 2024-йисуз республикадин здравоохраненидин идарайриз санитарный транспортдин 158 уьлчме рекье тун пландик кутунва (абурун сиягьдик винидихъ къалурнавай 42 машинни акатзава). И макьсадриз 178 миллион манатдив агакьна пулдин такьатар чара ийида.
Такьатар бес жезвач
Дагъустандиз нубатда акъвазнавай муьгьтеж ксар яшайишдин кIвалералди таъминарун патал пулдин такьатар бес жезвач. Идакай, РД-дин эцигунрин, архитектурадин ва ЖКХ-дин министр Александр Нестерован гафарал асаслу яз, «Дагъустандин экономика» телеграм-каналди хабар гузва.
Чешмедин делилралди, республикада нубатда акъвазнавайбурун кьадар йисалай-суз артух жезва. Алай вахтунда абурун кьадар 63 агъзур касдив агакьнава. Абурун арадай 6 агъзурдалай виниз агьалияр набутар ва набут аялар авайбур я.
А.Нестерова къейдзавайвал, республикадин бюджетдай ахъайзавай такьатар — 300 миллион манат — и серенжем тамамдаказ кьилиз акъудун патал бес жезвач. ГьикI хьи, яшайишдин кIвалерин 1 кв. метрдин къимет хкаж хьуникди субсидиядалди таъминариз жезвай агьалийрин кьадарни тIимил жезва.
Гуьзчивилик жедайвал
Кеферпатан Кавказдин федеральный университетда теплицаяр идара ийидай цIийи жуьредин къурулуш туькIуьрнава. Идакай РД-дин хуьруьн майишатдин ва недай суьрсетдин министерстводин телеграм-каналди хабар гузва.
Чешмеди къейдзавайвал, «акьуллу теплицадин» ва веб-интерфейсдин чешне (прототип) арадал гъана акьалтIарнава. И такьат туькIуьрнавайбурун гафаралди, интеллектуальный къурулушдивай теплицайра гьавадин шартIар (микроклимат) гуьзчивилик кутаз жеда. И кIвалах ада чимивилин рекъемар, ламувал, гьавадин состав ва кар алай маса делилар ахтармишуналди ва абур къайдадик кутуналди кьиле тухуда.
Ведомстводин телеграм-каналди гьакIни хабар гузвайвал, теплицайра эцигнавай датчикри накьвадин ламувилин дережа гьи гьалда аватIа ва набататриз цихъ авай игьтияждикай датIана делилар агакьарда. И карди вахт-вахтунда набататриз яд гудай, ам артух ишлемишун лап агъа кIанин рекъемдал гъидай, накьвадик гзаф ламувал акатунин вилик пад кьадай мумкинвал гуда.
Гьазурайди — Муса Агьмедов