Дагъустандин Пенсийрин фондунин малуматдал асаслу яз, агьалиди вичин паспорт, тIвар ва я фамилия дегишарайла, цIийи делилрикай Россиядин Пенсийрин фондуниз (ПФР) хабар гун лазим я. Эгер цIийивилерикай хабар тагайтIа, агьали и ва я маса госкъуллугърикай менфят къачудайла, четинвилерал расалмиш жеда.
Мисал яз, алай вахтунда Дагъустандин Пенсийрин фондуни дидевилин (хизандин) капитал (МСК) патал сертификат проактивный къайдада, яни агьали вич Дагъустандин Пенсийрин фондуниз ва я МФЦ-диз фин тавуна, туькIуьрзава. Мадни ачухдаказ лагьайтIа, агьалиди арза кхьин лазим туш, идаради вичи лазим вири документар кIватIзава.
Гьа са вахтунда, эгер МСК-дин сагьибди паспорт ва я фамилия дегишарнавайдакай вахтунда хабар тагайтIа, жуьреба-жуьре идарайри, гьа гьисабдай яз ПФР-дин органри электронный къайдада агакьарзавай госкъуллугърикай менфят къачун патал Личный кабинетдиз гьахьдайла, четинвилер гьалтда.
Пенсийрин фондунин кIвалахдин кьилин хилерикай сад ОПС-дин (обязательное пенсионное страхование) къурулушда персонифицированный учет (яни страховой взносрин кьадар, индексациядилай кьулухъ пенсиядин кьадар тайинарун ва икI мад) кьиле тухун я. Ам гьар са касдиз талукьди я, сифтедайни ам гьар садан пенсийрин гьакъиндай делилар ихтибар ийиз жедайвал хуьн ва пенсия тайинардайла, гьакI адан гьахъ-гьисабдин вахтунда а делилрикай менфят къачун патал арадал гъанва.
Инсан ОПС-дин къурулушда регистрация авунвайдакай хабар гузвай документ СНИЛС (страховой номер индивидуального лицевого счёта) я. Ана гьар са касдин, дуьньядал атай вахтунилай башламишна, вири делилар гьатзава. СНИЛС инсандиз са сеферда гузвай кьетIен документ я. Ам кIвалахдал акъвазун, аялрин бахчадиз ва я кIелдай идарадиз фин, медицинадин ва я яшайишдин рекьяй къуллугърикай менфят къачун, ПФР-диз арза гун, Госкъуллугърин Сад тир порталда ва я Россиядин Пенсийрин фондунин сайтда Личный кабинет туькIуьрун патал лазим къвезва. Гьаниз килигна, СНИЛС-да къалурнавай делилар дуьзбур хьунихъ еке важиблувал ава. Винидихъ хабар ганвайвал, инсанди, цIийи паспорт къачурла, тIвар ва я фамилия дегишарайла, ам вич яшамиш жезвай чкада Пенсийрин фондунин подразделенидиз фин ва хьанвай дегишвилерикай хабар гун лазим я. Амма СНИЛС-дин нумра дегиш жезвайди туш.
«Лезги газет»
