13-мартдиз Махачкъалада, ДГУ-дин ректоратдин конференцияр тухудай залда, машгьур журналист, жемиятдин деятель, РД-дин Общественный палатадин член, ДГУ-дин электронный СМИ-рин кафедрадин заве­дующий Ильман Алипулатован къе­лем­дикай хкатнавай “Девир. Инсанар. Ва­къиаяр” тIвар алай цIийи ктабдин презента­ция кьиле фена.

Ана Дагъустандин Халкьдин Собранидин депутатри, министер­ст­вой­­ринни ведомствойрин, жемиятдин векилри, алимри ва масабуру иштиракуни мя­ре­катдин важиблувиликай лугьузвай. Гьуьрметлу мугьманрин арада РД-дин Халкьдин Собранидин Председателдин за­меститель Елена Ельникова, РД-дин Кьилин информациядин сиясатдин Управленидин начальник Рашид Акавов, республи­кадин печатдин ва информациядин мини­стр Умаросман Гьажиев, Дагъустандин Об­щественный палатадин председатель Аб­дулмумин Иб­рагьимов, ДГАУ-дин ректор Зайдин Жам­булатов, республикадин сиясатдинни жемиятдин машгьур деятель Имам Яралиев, РД-дин журналистрин Союздин председатель Али Камалов, “Лезги­ газетдин” кьилин редактор Мегьамед Ибрагьимов ва масабур авай.

“Къе чун рахазвай ктаб республикадин жемиятдин вакъиайрин тарих я. Ам кхьенвай кас са шумуд цIуд йисуз пешекарвилин журналистикадал машгъул жезва, Да­гъустандин жемиятдин, сиясатдин уьмуьрда активнидаказ иштиракзава. Республикада кьиле физвай лишанлу гьар са вакъи­адин жигьетдай ада вичин фикир лугьузва, дуьз къимет гуз алахъзава”, — ла­гьана, мярекат ачухдайла, илимдин кIва­лахдин ва инновацийрин рекьяй ДГУ-дин проректор Назир Ашурбегова.

Ильман Алипулатован гафаралди, вичин цIийи ктабда ам Дагъустандин сиясатдинни яшайишдин уьмуьрдин гьа­къи­къи шикил ягъиз, алай аямда СМИ-рин кьетIенвал къалуриз алахънава, халкьди гьукумдизни СМИ-риз ийизвай ихтибардин жигьетдай кьиле тухванвай социологиядин ахтармишунрин нетижаяр чапнава.

Видеоалакъадин куьмекдалди “Девир. Инсанар. Вакъиаяр” ктабдикай вичин фикирар гражданвилин общество вилик тухунин ва инсанрин ихтияррин рекьяй РФ-дин Президентдин патав гвай Советдин член Александр Бродани лагьана. “Ктабда дагъустанвийрик къалабулух кутазвай месэлаяр къарагъарнава, жемият авай гьал, ада вичи вич тухузвай къайда ачухарнава. Ктабди кIел­завай касдивни фикириз тазва…”, — къейдна А.Брода.

Лагьана кIанда, Ильман Алипулатован цIийи ктабда жуьреба-жуьре йисара журналистри адахъ галаз кьиле тухванвай ин­тервьюяр, автордин къелемдикай хкатнавай илимдин макъалаяр, сиясатдин очеркар, зарисовкаяр гьатнава. Адакай вузра кIелзавай студентривай, журналистривай, сиясатчийривай, тарихчийривай ва масабурувай менфят къачуз жеда.

Агьмед  Магьмудов