КьепIир Кьурагь районда чIехи хуьрерикай сад я. Алай вахтунин четинвилер и хуьруьн агьалийрини гьиссзава.
Къейд авун лазим я хьи, райондин, адак акатзавай хуьрерин муниципалитетрин бюджетар са акьван пайгарбур туш. Гьавиляй яшайишдин, культурадин ва маса месэлаярни рикIиз кIанивал гьялиз жезвач. Гьалар ва шартIар ихьтинбур ятIани, исятда КьепIиррин хуьруьн администрациядиз регьбервал гузвай Азедин Къазиева агьалийрин рикIерик секинсузвал кутазвай месэлаяр гьялдай, хуьр аваданламишдай, кIвалахдин алава чкаяр яратмишдай рекьер-хуьлер жагъурзава.
Азедин Агьмедовичакай рахайтIа, ам 1964-йисуз КьепIиррин хуьре дидедиз хьана. Ада ина юкьван школа куьтягьна. Ахпа Россиядин Армиядин сергьятар хуьзвай частара къуллугъна. Дагъустандин механический техникум ва Дагъустандин гостехуниверситет акьалтIарай А.Къазиева хейлин йисара УГИБДД-дин махсус ротада старший инспекторвиле къуллугъна. Вад йисуз ада Дербент шегьердин налогрин инспекциядин начальникдин заместителвилин везифаяр тамамарна.
РикIел аламайвал, 2015-йисуз Дагъустанда ва гьакI Кьурагь райондани сечкияр кьиле фенай. А.Къазиеван алакьунрикай, бажарагъдикай хабар авай хейлин хуьруьнвийри адаз КьепIиррин хуьруьн администрациядин кьилин къуллугъдал вичин кандидатура къалурун меслятна. Сечкийра жемятди адаз гзаф сесерни гана. Ингье къе агьалияр ягъалмиш хьанач. А.Къазиева жемятдин вилик хиве кьур крар галай-галайвал кьилиз акъудзава.
Хуьруьн куьчейра эквер авайди тушир, и месэлани гьялнава. Хуьруьн юкьвал алай кьилин муьгъ ацахьдай гьалда авай. А.Къазиева ам ремонтдай, куьчейра чиргъ твадай, са шумуд магьледа майданар туь-кIуьрдай, агьалияр хъвадай михьи целди таъминардай мумкинвилер жагъурна. Хуьруьн вири кIвалериз нумраяр ганва. Хуьруьн юкьни — юкьвал къав алай алишверишдин базар эцигнава. Хуьруьн Культурадин кIвал капитальнидаказ ремонтнава. Бязи куьчейрик цин турбаяр кутунва. Хуьруьн абур тир жуьмя мискIиндин дараматни къайдадиз гъанва. Лугьун лазим я хьи, муниципалитетдин кьилиз и крар бегьемариз хейлин хуьруьнвийрини чпелай алакьдай куьмекар гана. ГьакI “Кьурагь район” муниципалитетдин кьил Замир Азизова, РД-дин Халкьдин Собранидин депутат Абусупьян Хархарова, Москвада яшамиш жезвай кьепIирви Октай Асланова гайи куьмекни виле акьадайди я. О.Асланова хуьр патал кьве электротрансформатор маса къачуна, багъишна.
Хуьре жезвай дегишвилерал жемятди разивалзава. Хъсандиз ремонт авурдалай гуьгъуьниз аялрин бахчада алава группадиз аялар кьабулнава. Дуьз къайдада ремонтнавай школадин спортдин залда дарамат чими ийидай пичер эцигнава. Жегьилар ина кьуршахар кьунал ва волейбол къугъунал машгъул жезва.
КьепIирдал мукьвал-мукьвал спортдинни культурадин мярекатарни тешкилзава. ИкI, Фикрет Асланован призар патал жаванрин арада кьуршахар кьунай тешкилзавай акъажунра гьар йисуз Кьиблепатан Дагъустандин районрин пагьливанри иштиракзава. Ина райондин жегьилрин арада футболдайни акъажунар кьиле тухузва. Кье-пIирвийри администрацияди тешкилзавай милли суваррикни хушвилелди иштиракзава.
— Чалай рикIик квай вири месэлаяр гьялиз жедачир, эгер чи райондин кьил Замир Загьидиновича куьмекар гуз хьаначиртIа, — лугьузва А.Къазиева.
Мадни къейд авун лазим я хьи, муниципалитетдин къвалав мергьяматлувилин “Абад КьепIир” фонд тешкилнава. Алай вахтунда Москвада яшамиш жезвай и фондунин регьбер Гьасан Гьасанова хуьруьн яшайишдин месэлаяр гьялунин карда муниципалитетдиз мукьвал-мукьвал куьмекар гузва. Фондуник чпин пай кутазвай ва республикадилай къеце яшамиш жезвай кьепIирвиярни гзаф я. Муниципалитетдин кьилин фикирдик квай крар мад ава. Са рахунни алач, абурни ада агьалияр рази жедайвал бегьемарда.
Фахрудин Мирзоев
