ГъвечIи чанда — чIехи руьгь

“islam-dag.ru” cайтдай

Гатун югъ тир. КапI ийидай вахт мукьва жезвай. Умар халиф (къуй вичелай Аллагь рази хьурай) са акьван тади квачиз мискIиндиз физвай. И арада адаз йигин камаралди рехъ атIузвай са гъвечIи гада акуна. “Яраб идак икьван тади акатунин себеб вуч ятIа? Белки, са вуч ятIани герекзава жеди, тахьайтIа, геж жезвай чка хьун мумкин я…” — фикирна Умара.

Эхирни ада гададивай хабар кьуна:

— Я хва, вак вуч тади ква? Дердияр авани? Вун икьван фад-фад вучиз физва?

— Зун мискIиндиз физва, — жаваб хгана гадади.

— Я чан хва, вун гъвечIизама. КапI авун ваз гьелелиг ферз туш. Тади къачун герек авач.

Гада тажуб хьанвай тегьерда Умаран вилериз килигна ва гуьгъуьнлай лагьана:

— КапI авун патал гъвечIибурни чIехибур жедайди яни? Идалай гъейри, эгер зун гъве­чIизамаз капI ийиз вердиш тахьайтIа , мумкин я, чIехи хьайила, заз и ферз кьилиз акъудиз четин жеда.

Умар халиф са геренда хиялри тухвана. Ахпа адан вилер накъварив ацIана. Ада лагьана:

— Я Аллагь! Гьикьван хъсан ва акьуллу гада я! Адахъ гьар са чIехидахъ хьана кIанзавай руьгь ава.

 Гунагьар сир яз хуьх!

“vk.com” сайтдай

Жуван гунагьрикай масабуруз ахъаймир. Мугьаммад Пайгъамбарди  лагьана: “Виридаз ван жедайвал чпи авунвай гунагьрикай ахъайзавайбурулай гъейри, зи тухумдай тир амай вирибу­рун жаза кьезиларда. Инсанди йифиз гунагь авуна, анжах Аллагьди ам чуьнуьхна. Амма экуь­нахъ­ инсанди лугьузва: “Фланди. За ихьтин гунагь авуна”. Маса гафаралди лагьайтIа, ада йиф Аллагьдин пердедик акъудзава, экуьнахъ лагьайтIа, а перде алудзава”. Аль-Бухари 6069, Муслим 2990.