“Дагъустандин гьар са пипIе вичин хсуси, маса садазни ухшар тушир женнетдин багъ ава, ихьтин гьар са чка дагъустанвийриз багьа я. Инсандиз хайи чил гьамиша гуьлуьшан яз, цуьк ахъайна акуна кIанда…”, — ихьтин ватанпересвилин, дамахдив ацIанвай фикирралди башламишзава Мегьарамдхуьруьн райондин кьил Фарид Агьмедова райондин мулкунал алай гуьзел макандиз — ботанический багъдиз мугьман хьуникай малумат.
ИкI, 20-апрелдиз Фарид Агьмедов, Мегьарамдхуьруьн райондиз кIвалахдин рекьяй мугьман хьанвай РД-дин Гьукуматдин Председателдин заместитель Абдулмуслим Абдулмуслимов ва хуьруьн майишатдинни недай суьрсетдин министр Баттал Батталов Тагьирхуьруьн-Къазмайрал яшамиш жезвай чи амадаг, алим-селекционер, РД-дин Федеральный аграрный илимдин центр ФГБНУ-дин илимдин чIехи къуллугъчи Теймур Гьабибован ажайиб, вичиз тешпигь авачир майишатдиз — набататрин багъдиз кьвед лагьай сеферда мугьман хьана. Райондин кьили хабар гузвайвал, ихтилат районда субтропикра экъечIдай емиш — киви гьасилун гегьеншаруникай давам хьана. РикIел хкин, идалай са тIимил вахт вилик алимди муниципалитетдин руководстводиз районда чIехи майданра ва кьадарра аваз киви гьасилиз башламишунин, гьакIни ана субтропикрин культура илимдин рекьяй ахтармишунин кIвалах давамаруниз талукь теклиф ганай.
“Чи райондин кьиблепатан гьавадин шартIари гьар жуьре емишрин, мерейрин культураяр гьасилдай ва абурун виниз тир бегьерар вахчудай мумкинвал гузва. Районда лежберар алай аямдин, ремонтантный сортарин некьияр гьасилунин кардив еке гьевесдивди эгечIнава. Къенин йикъалди 15 гектар чилера некьияр цанва. 4 гектардай алатай йисуз бегьер кIватI хъувуна, мад 7 гектарда цун планламишнава. Некьияр, мереяр гьасилун, уьзуьмчивал ва багъманчивал хьиз, райондин шартIара гележег авай хел я”, — къейдзава ада.
Набататрин багъда ва алимди кIвале тешкилнавай хайи макандин культурадиз талукь музейда экскурсия авурдалай кьулухъ делегация ЦIийихуьруьн мад са майишатдиз мугьман хьана.
“Санлай къачурла, чалай райондин хуьруьн майишатдин суьрсет гьасилзавайбур некьияр гьасилунин кардиз итиж авунал желб ийиз алакьнава. Амма лежберривай государстводин патай куьмек, ийизвай харжийрин эвез тир субсидияр къачуз хьунин месэлади чи рикIик къалабулух кутазва, гьикI лагьайтIа, некьияр, гьайиф хьи, и рекье куьмек гун лазим тир емишрин арада ава. Ида лагьайтIа, чаз майданар артухардай мумкинвал гудай. Санлай къачурла, Абдулмуслим Муьгьидиновича ва Баттал Вагьидовича чи теклиф разивилелди кьабулна ва месэла гьялун патал бязи меслятар гана”, — къейдзава райондин кьили.
Чи мухбир
