Вири уьлкведа хьиз, чи республикадани «Аскердиз кагъаз» лишандик кваз дяведин махсус серенжемда иштиракзавайбуруз кагъазар кхьинин акция кьиле физва. Ватанпересвилин буржи кьилиз акъудзавайбуруз кагъаз Хив райондин Дардархуьряй тир 2-классдин ученик Агьмад Киберовани кхьена. Аялди кагъазда вичин дах Селимхан Киберовани, гуьгьуьллудаказ фена, Донбассда Россиядин Яракьлу Къуватрин жергейра къуллугъзавайдакай ва вич дахдихъ дарихмиш тирдакайни кхьенвай.
Агьмад Киберован кагъаз СВО-дин иштиракчи, дирибаш лезги хва Ислам Гьамзатовал агакьна. Мотострелковый дивизиядин минометчик Ислам СтIал Сулейманан райондин Герейханован хуьруьн 2-отделенидай я.
Агьмадан кагъазди И.Гьамзатован гьевес хкажна. Ада чар вичихъ галаз махсус серенжемда иштиракзавай Дагъустандай тир аскерриз ва офицерриз кIелна, отпускдиз хтайла, Агьмадан патав кIвализ фидайдакай лагьана.
Ислам Гьамзатова вичин гаф кьилиз акъудна: отпускдиз хтай ам, Агьмадаз хабарни авачиз, савкьатарни къачуна, Дардархуьруьз фена. Ам Кибероврин хизанди багъри кас хьиз кьабулна. Исламан ва гъвечIи Агьмадан гуьруьш теспачавал квайди хьана. СВО-дин аскерди Агьмадаз савкьатар гана, кагъаз кхьинай чухсагъул лагьана.
— Агьмад рикIиз чими, фад акахьдай, хуш къилихдин аял я, са цIуд-цIувад декьикьадилай чун халис дустариз элкъвена, — лугьузва И. Гьамзатова. – И гуьруьшдикай за, Донбассдиз хъфейла, жуван женгинин юлдашризни ихтилатда. Къенлай кьулухъ чун дустар, хванахваяр жеда лагьана, гъилер яна.
Ислам Гьамзатова вичин гъвечIи дустуниз лагьайвал, хайи ерийривай яргъа махсус серенжемда иштиракзавай аскеррин гуьгьуьлар школьникри кхьизвай кагъазри хкажзава, абуру гьиссзава хьи, абурун далудихъ ватанперес халкь гала.
И.Гьамзатова Агьмадаз «сирни» ахъайна: ихьтин кагъазар СВО-дин иштиракчийри чпив хуьзва. КIвалихъ, багърийрихъ вил хьайила, а кагъазар кIелзава.
СВО-дин иштиракчи Ислам Гьамзатовахъ ва 2-классдин ученик Агьмад Киберовахъ элкъвена чаз лугьуз кIанзава: куь дуствал, хванахвавал къенлай кьулухъ яргъал йисара давам хьурай!
Хазран Кьасумов
