Мукьвара СтIал Сулейманан райондин кьил Саид Темирханова вичин хайи Алкьвадрин хуьруьз ял ягъиз хтанвай машгьур алим, Россиядин илимрин академиядин философиядин Институтдин директор Абдусалам Гьуьсейновал кьил чIугуна. Идакай ада вичин телеграм-каналда хабар гана.
Гуьруьшдин вахтунда Саид Темирханова алимдив Дагъустандин гьукуматдин шабагь — Гьуьрметдин орден вахкана ва яргъал йисара илимдин хиле намуслувилелди зегьмет чIугунай, къазанмишнавай агалкьунрай ганвай шабагь РД-дин Кьил Сергей Меликован патай мубаракна.
Абдусалам Гьуьсейнов машгьур Алкьвадар Гьасанан тухумдин векилрикай сад я. Академикдин шабагьрин жебеханада цIудралди орденарни медалар, гьуьрметдин тIварар, дипломар ава. ЮНЕСКО-дин дипломдизни Махатма Гандидин медалдиз лайихлу хьуни чи ватанэгьлидин илимдин рекьиз международный дережада аваз къимет ганвайдан гьакъиндай шагьидвалзава.
Россиядин Гьукуматдин премиядин лауреат, Санкт-Петербургдин госуниверситетдин гьуьрметлу доктор, Новгороддин госуниверситетдин гьуьрметлу профессор тир Абдусалам Гьуьсейнован зегьметдин рехъ вичин пешедиз вафалу хьунин, Ватандиз къуллугъ авунин надир чешме я.
«Лезги газетдин» редакциядин коллективди алимдиз нубатдин агалкьун мубаракзава, адахъ чандин сагъвал, яргъи уьмуьр хьун алхишзава.
Чи мухбир
