Мукьвара Россиядин журналистрин Союздин Дагъустанда авай отделенидин ревизкомиссиядин председатель, «Лезги газетдин» вафалу амадагрикай сад тир Мурад Мегьамедкеримоваз республика­дин жемиятдин кьилин шабагь — «Честь и гордость Дагестана — Золо­той орел» орден гана. Шабагь адав РД-дин­ Об­щественный палата­дин председателдин­ куь­мек­чи, генерал-пол­ков­ник М. Танкаеван тIвар­цIихъ галай фондунин председатель Гьа­сангьуьсейн Аб­дулже­ли­лова вах­кана.

Мурад Мегьамедкеримован­ бин­е Агъа СтIалрин хуьр я. Ада РД-дин Общественный палатадин экспертдин везифаяр­ тамамарзава, ам гьакIни РФ-дин Росреестрдин РД-да авай Управлени­дин Общественный палатадин­ член я. Эхиримжи йисара чи ва­танэгьли активнидаказ жемият­дин ва мергьяматлувилин кIва­лах­рал машгъул жезва. Гьар йисуз гьам хайи СтIал Сулейманан­ районда, гьамни республикадин­ меркезда мергьяматлувилин хей­лин серенжемар тешкилзава­.

Россиядин журналистрин Со­юздин Дагъустанда авай отделенидин председатель Мегьамед Ибрагьимован гафаралди, М.Мегьамедкеримова республикадин милли пресса вилик финикни вичин пай кутазва.

«Чи йикъара милли газет­риз жуьреба-жуьре проектар кьилиз акъудиз, хайи чIаларин месэлаяр гьялиз куьмекар гузвай меценатар са акьван пара авач. Абурукай сад Мурад Мегьамедкеримов я. Ада гьар йисуз вичин патай 150-дав агакьна хизанриз йисан «Лезги газет» кхьизва. Хайи чIалай олимпиадаяр, конкурсар тешкилунин крара куьмекар гузва. Дагъустандин журналистрин отделенидин са жерге проектарни адан иштираквал аваз кьилиз акъуднава. Адан зегьметдиз лайихлу дережада къимет гун кутугай кар хьана», — лагьана «Лезги газетдин» кьилин редакторди.

Агьмед  Магьмудов